Qərb Nikol Paşinyanın Anna Akopyanla əvəzlənməsi ssenarisini nəzərdən keçirir.
İnterpress.az xəbər verir ki, bu barədə erməni mediası yazıb.
“Bir neçə həftə əvvəl bizə məlumat daxil olub ki, ABŞ-nin sifarişi ilə Ermənistanda ictimai əhval-ruhiyyəni öyrənmək, Ermənistan vətəndaşlarının Nikol Paşinyanın həyat yoldaşı Anna Akopyanı baş nazir kimi görməyə hazır olub-olmadığını anlamaq üçün sorğu keçirilib”, – erməni mediası yazıb.
Nəşr qeyd edir ki, sorğuların nəticəsinin nə olduğu bilinmir, lakin Qərb üçün Paşinyanı əvəz edə biləcək namizədlər siyahısında Anna Akopyanın da olduğu açıq-aydın görünür.
ABŞ-nin Anna Akopyanla bağlı planları Ermənistanın baş nazirinin həyat yoldaşının anti-Rusiya siyasətinin tərkib hissəsi kimi Ukraynaya səfər etdiyi, Zelenskilər ailəsi ilə görüşdüyü, ruslar tərəfindən öldürüldüyü iddia edilən günahsız ukraynalıların xatirəsini ehtiramla yad edib, gül dəstələri qoyduğu andan ciddi çalarlar əldə edib.
Anna Akopyanın bu addımı atması amerikalıları onun Paşinyandan da irəli getməyə hazır olduğuna inandırıb.
“Əslində, Anna Akopyanın hiperaktivliyini izah edən ABŞ-nin hazırladığı ssenaridir. O, uğurlu iş adamları, bloqerlər, qadınlar, tələbələr və ölən hərbçilərin yaxınları ilə görüşür. Hər gün Anna Akopyanın fəaliyyəti ilə bağlı reklam çarxları yayılır. Əslində Anna Akopyan seçkilərin elan edilməməsinə baxmayaraq, aktiv kampaniya aparır.
Anna Akopyan da işinə geosiyasi ləzzət qatır. Məhz bu səbəbdən bu yaxınlarda Vatikanda yenidən Ukrayna prezidentinin xanımı ilə görüşdü. O, Qərbə açıq siqnal verir ki, etimadı qazanacağı təqdirdə hər şeyə hazırdır.
Ekspertlər son səs-küylü istefaların məhz Anna Akopyana hakimiyyətin verilməsi çərçivəsində baş verdiyini istisna etmirlər. Ən mühüm vəzifələrə Anna Akopyanla yaxın əlaqələri olan şəxslər təyin olunacaq.
Anna Akopyanın dostu Arpin Sarkisyan daxili işlər naziri təyin edilib, Anna Akopyanın qudası David Xudatyan isə ərazi idarəsi naziri olacaq. Bu mövqelərin hər ikisi seçkilər zamanı əsasdır.
Bir sözlə, Qərb bu məsələyə ciddi yanaşır və indi, deyəsən, bu ssenarinin həyata keçirilməsi üçün hər şey dəqiq şəkildə edilir”, – nəşr yazıb.
Xuraman Etibarlı
İnterpress.az
