Livanın Baş naziri Nəcib Miqati İsrailin hücumlarının atəşkəsə yönəlmiş bütün səyləri rədd etdiyini ifadə edib.
SİA-nın məlumatına görə, o, İsrailin Livanın cənubunda orduya aid mövqeni hədəf aldığı hücumla bağlı yazılı açıqlama paylaşıb.Livanın Baş naziri açıqlamasında bildirib: "İsrailin ölkənin cənubundakı ordu mərkəzini birbaşa hədəf alması, atəşkəsə nail olmaq üçün davam edən bütün səyləri və kommunikasiyaları, ordunun cənubdakı mövcudluğunun gücləndirilməsi və Birləşmiş Millətlər Təşkilatının 1701 saylı qətnaməsinin tətbiqini rədd edən, qanlı bir mesajı təmsil edir."
Miqati ordunun və mülki şəxslərin dəfələrlə məruz qaldığı hücumlarınölkədə baş verənlərə səssiz qalan beynəlxalq cəmiyyətin mənzərəsini əks etdirdiyini vurğulayıb və əlavə edib:"İsrailin hər cür həlli rədd edən mesajları davam edir. Sentyabr ayında Amerika-Fransa atəşkəs çağırışında olduğu kimi gündəmdə olan həll yoluna da rədd cavabı verir."
“X” sosial şəbəkəsindəki açıqlamaya görə, İsrail ordusu Kileyle-Sur yolu üzərindəki Əl-Amiriye bölgəsində yerləşən ordu mövqeyini hədəf alıb. Hücum nəticəsində ilkin məlumata görə bir Livan əsgəri həyatını itirib, aralarında vəziyyəti ağır olanların da olduğu 18 əsgər yaralanıb. İsrail ordusu isə Livan ordusuna qarşı müharibə aparmadığını iddia edib.
Bu hücumla birlikdə 8 oktyabr 2023-cü ildən bu yana İsrail hücumları nəticəsində ölən Livan əsgərlərinin sayı 41-ə çatıb.
