"Kiçik Ay" kimi tanınan 2024 PT5 asteroidi Günəşə doğru hərəkət edəcək və 2055-ci ilə qədər Yerdən uzaqlaşacaq.
Bakıvaxtı.az xəbər verir ki, bu barədə “The Guardian” qəzeti ABŞ-nin Milli Aeronavtika və Kosmik Tədqiqatlar İdarəsinin (NASA) Yerətrafı Obyektlərin Öyrənilməsi Mərkəzinin alimlərinə istinadən məlumat yayıb.
Qeyd olunur ki, hazırda asteroid Yerdən 3,2 milyon kilometr məsafədə yerləşir ki, bu da Aya olan məsafədən təxminən doqquz dəfə çoxdur. O, planetin cazibəsinə düşəcək qədər Yerə yaxın deyil.
Gələn ilin yanvarında asteroidin Yerə 1,7 milyon kilometr məsafədə yaxınlaşacağı gözlənilir. Obyektin təxminən 10 metr diametrli kiçik ölçüsü onu adi gözlə görməyə imkan verməyəcək.
Xatırladaq ki, 2024 PT5 asteroidi avqustun əvvəlində ATLAS teleskop sisteminin müşahidəsinə düşüb.
Diametri təxminən 10 metr olan asteroid Yerin peyki ilə müqayisədə çox kiçikdir.
Bu, Yerin sahib olduğu ilk "Kiçik Ay" deyil. Tədqiqatçılar 1981 və 2022-ci illərdə iki "Kiçik Ay" hadisəsinin baş verdiyini bildiriblər.
