“Barselona”nın argentinalı keçmiş hücumçusu Lionel Messi, 125 illik yubileyi münasibətilə Kataloniya klubunu təbrik edib.
Arena.az məlumat verir ki, əlamətdar tədbirin qeyd edilməsi bu gün, noyabrın 29-a nəzərdə tutulub:
“Barselona”nı 125 illik yubileyi münasibətilə təbrik edirəm, bu klubun bir hissəsi olmaq və “Barselona” azarkeşi olmaq mənim üçün böyük şərəfdir. Bəxtim gətirdi ki, tanrı məni bu yerə gətirib.
Mən klub, şəhər, insanlar, məhəbbət və başqa hər xüsus üçün darıxıram. Həmişə olduğu kimi, ümidvaram ki, uğurlarımız davam edəcək və biz bu klubu daha böyük və daha yaxşı edəcəyik. “Barselona” digərlərinə bənzəməyən çox gözəl klubdur”, – “Catalunya Radio” “Leo”dan sitat gətirir.
Xatırladaq ki, Messi 2003-2021-ci illər aralığında “Barselona”nın uğurları üçün çalışıb. “Leo” “baluqrana”nın heyətində 778 oyun keçirib, 672 qol vurub və 303 məhsuldar ötürmə verib.
Messi “Barselona” ilə bütün mümkün ali klub yarışlarında dəfələrlə qalibiyyətlər əldə edib, şəxsi və klub rekordları müəyyənləşdirib.
“Leo” 2021-ci ildə “Barselona”dan azad agent qismində ayrılaraq, PSJ-yə keçib.
Lionel Messi 2023-cü ilin yayından MLS təmsilçisi “İnter Mayami”də çıxış edir. Argentinalı ulduz amerikan klubuna PSJ-dən azad agent qismində qoşulub. “Leo”nun “İnter Mayami” ilə müddəti 2025-ci ilin dekabr ayının sonuna qədər qüvvədə olacaq müqaviləsi var.
Argentinalı ulduz cari mövsümdə “İnter Mayami”nin heyətində bütün yarışlarda 25 oyuna çıxıb, 23 qol vurub və 13 məhsuldar ötürmə verib.
Təcrübəli ulduzun “İnter Mayami” karyerası ümumilikdə 39 oyun, 34 qol və 18 məhsuldar ötürmədən ibarətdir.
“Leo” hazırda kapitanı olduğu Argentina yığmasında 2005-ci il avqustun 17-də debüt edib. Ulduz hücumçu yığmada 191 oyun keçirib, 112 qol vurub və 61 məhsuldar ötürmə verib. Bu göstəricilər üzrə “Leo” yığmanın mütləq rekordçusudur.
Argentinalı superulduz Argentina yığması ilə Yay Olimpiya Oyunlarının (2008), Amerika Kubokunun (2021, 2024), FIFA Dünya Kubokunun (2022), Çempionların CONMEBOL-UEFA Kubokunun (2022) qalibi olub. Həmçinin Messi dünya çempionatının (2014) və Amerika Kubokunun gümüş (2007, 2015, 2016) mükafatçısı olub.
“Leo”nun qənimətlər muzeyində müxtəlif fərdi mükafatlar, həmçinin 8 “Qızıl top”u var.
