İsveçrə Baş Prokurorluğu özəl "Lombard Odier" bankını Özbəkistanın ilk prezidentinin qızı Gülnarə Kərimovanın yaratdığı "Office" təşkilatı üçün pulların yuyulmasında ittiham edib.
"Unikal" xəbər verir ki, bununla bağlı məlumat İsveçrə Baş Prokurorluğunun saytında yerləşdirilib.
Məlumata əsasən, ittihamlar təkcə İsveçrədə 1796-cı ildən fəaliyyət göstərən maliyyə institutuna deyil, həm də onun Kərimovanı bankda işə başlamazdan əvvəl tanıdığı və onun investisiya komitəsinin üzvü olduğu iddia edilən fondun keçmiş menecerlərindən birinə aiddir. Prokurorluq "Lombard Odier" və onun keçmiş əməkdaşını irimiqyaslı çirkli pulların yuyulmasında və 2005-ci ildən 2012-ci ilə qədər "Office"nin gəlirlərini gizlətməkdə “həlledici rol” oynadıqlarından şübhələnir.
Eks-menecerin Kərimova ilə bağlı doqquz bank hesabını idarə etdiyi dəqiqləşdirilir.
“Bu kontekstdə müttəhim, həmçinin, ofisin heç bir biznesi və ya işçisi olmadığını və cinayət mənşəli vəsaitlərin köçürülməsi üçün qanuni cəbhə təmin etmək üçün cinayət təşkilatı tərəfindən yaradıldığını bilə-bilə yalandan onu fasiləsiz fəaliyyət göstərən müəssisə kimi təsvir edib”, - məlumatda deyilir.
Baş Prokurorluq təqsirləndirilən şəxsin cinayət yolu ilə əldə edilmiş gəlirlər olduğunu bildiyi əmlakın müəyyən edilməsi, axtarışı və müsadirəsinin qarşısının alınması üçün bir sıra addımlar atdığından şübhələnir. "Lombard Odier"ə qarşı iddialar bankın bu hesabların açılması və idarə edilməsi zamanı çirkli pulların yuyulmasına qarşı mübarizə standartlarına və öz qaydalarına əməl etməməsi, həmçinin çirkli pulların yuyulmasının qarşısının alınması üçün tədbirlər görməməsi ilə bağlıdır.
Kərimova 1989-2016-cı illərdə Özbəkistana rəhbərlik etmiş İslam Kərimovun böyük qızıdır. O, hazırda öz ölkəsində həbsdədir. 2015-ci ildə o, Özbəkistan məhkəməsi tərəfindən hədə-qorxu ilə pul tələb etməkdə və vergidən yayınmaqda təqsirli bilinib və buna görə 5 il həbs cəzası alıb. 2020-ci ildə keçmiş prezidentin qızı hədə-qorxu ilə pul tələb etməkdə və mənimsəmədə təqsirli bilinərək daha 13 il 4 ay həbs cəzası alıb.
