Yeni təlim dövrünün başlaması ilə Qazaxıstan Hərbi Dəniz Qüvvələri genişmiqyaslı döyüş hazırlığı yoxlanışından keçir. SİA Qazaxıstan Respublikası Müdafiə Nazirliyinin mətbuat xidmətinə istinadla xəbər verir ki, Aktau qarnizonunda dəniz piyadaları və digər birləşmələr də daxil olmaqla 1500-ə yaxın hərbi qulluqçu həyəcan siqnalı ilə qaldırılaraq, ən yüksək döyüş hazırlığı vəziyyətinə gətirilib.
Gəmilərin bazasında döyüş hazırlığının müxtəlif aspektləri, o cümlədən təxribat əleyhinə tədbirlər və taktiki əməliyyatlar yoxlanılıb.
Gəminin ekipajları döyüşə yaxın şəraitdə səmərəli fəaliyyət göstərmək bacarıqlarını nümayiş etdirərək, Xəzər dənizinə açılıblar. Dəniz piyadaları desant-hücum batalyonunun hərbçiləri yüksək hazırlıq nəticələri göstərib.
Hərbi Dəniz birləşmələrinin qüvvələri və aktivləri geniş ssenarilər çərçivəsində yoxlamadan keçirilir. Bu, şəxsi heyətin fövqəladə hallarda fəaliyyət göstərilməsi ilə bağlı vərdiş və bacarıqlarının təkmilləşdirilməsinə yönəlib.
