Kinorejissor Kamil Rüstəmbəyovun 100 illik yubileyi ərəfəsində məzarı ziyarət olunub.
Bu barədə Moderator.az-a Dövlət Film Fondundan məlumat verilib.
Dekabrın 7-də Azərbaycan kino sənətinin görkəmli nümayəndəsi, tanınmış kino və televiziya rejissoru Kamil Rüstəmbəyovun (1924-1991) anadan olmasının 100-cü ildönümü tamam olur.
Bu münasibətlə dekabrın 6-da Azərbaycan Dövlət Film Fondu, Azərbaycan Kinematoqrafçılar İttifaqı, C.Cabbarlı adına “Azərbaycanfilm” kinostudiyası və Kinorejissorlar Gildiyasının nümayəndələri, tanınmış mədəniyyət və incəsənət xadimləri sənətkarın məzarını ziyarət ediblər.
Anım tədbirini giriş sözü ilə Azərbaycan Dövlət Film Fondunun direktoru, Əməkdar incəsənət xadimi Cəmil Quliyev açaraq, Azərbaycan kino və televiziyasının inkişafında Kamil Rüstəmbəyovun xüsusi rolunu qeyd edib. Uzun illər rejissorla birlikdə fəaliyyət göstərmiş Xalq artisti, kinorejissor Əbdül Mahmudov iştirak etdiyi “Dağlarda döyüş” və “Axırıncı aşırım” filmlərinin çəkilişləri haqqında xatirələrini bölüşüb.
Sonda sənətkarın ailəsi adından çıxış edən qızı Aygün Rüstəmbəyova atasının xatirəsinə göstərilən diqqətə görə bütün tədbir iştirakçılarına təşəkkürünü bildirib.
