Azərbaycan Dövlət Pedaqoji Universitetinin (ADPU) nəzdində Azərbaycan Dövlət Pedaqoji Kollecində (ADPK) “Allaha salam” filminin təqdimatı keçirilib.
Təqdimatda filialın rəhbərliyi, müəllim və tələbə heyəti, kollecin məzunu olmuş şəhidlərin ailə üzvləri, qazilər, Azərbaycan Dövlət Mədəniyyət və İncəsənət Universitetinin prorektoru Sədaqət Əliyeva və filmin yaradıcı heyəti iştirak ediblər.
Filmin təqdimatından sonra ADPK-nın direktoru dosent İsrayil İsgəndərov yaradıcı heyətə təşəkkürünü bildirib və filmlə bağlı öz təəssüratlarını bölüşüb. İ.İsgəndərov gənclər arasında vətənpərvərlik ruhunun aşılanması və tarixi həqiqətlərin təbliği baxımından bu cür yaradıcı işlərin geniş vüsət almasının vacib əhəmiyyət kəsb etdiyini qeyd edib.
Daha sonra Azərbaycan Dövlət Mədəniyyət və İncəsənət Universitetinin prorektoru Sədaqət Əliyeva, filmin rejissoru Xəyal Rza, baş rolun ifaçısı Məmməd Səfa Qasımov film barədə fikir və təəsüratlarını bölüşüblər.
Kollecin şəhid tələbələrinin ailə üzvləri və qazilər dəvət və qayğı üçün ADPK rəhbərliyinə, vətəpərvərlik ruhlu film ərsəyə gətirdikləri üçün yaradıcı heyətə təşəkkürlərini ifadə ediblər.
Tədbirin sonunda yaradıcı heyət tərəfindən tələbə və qonaqların filmlə bağlı sualları cavablandırılıb.
Qeyd edək ki, 24 dəqiqədən ibarət olan “Allaha salam” filmi I Qarabağ müharibəsinin iştirakçısı olan və müharibədə hər iki ayağını itirmiş qazinin Zəfərdən öncəki və sonrakı həyatından bəhs edir. Filmin ssenari müəllifi və rejissoru Xəyal Rza, quruluşçu operatoru Məmmədəmin Əlizadə, bədii rəhbəri Oqtay Mirqasımovdur. Xalq artisti Məmməd Səfanın baş rolu ifa etdiyi filmdə Zeynəb Kəngərli və Məhəmməd Məmmədov kimi aktyorlar yer alıblar.
