Qlobal ərzaq qiymətləri noyabr ayında aylıq əsasda 0,5 % artaraq 2023-cü il aprel ayından bəri ən yüksək səviyyəyə çatıb və son 19 ayın zirvəsinə yüksəlib. İndeks illik əsasda 5,7 % artım göstərib.
Valyuta.Az xəbər verir ki, Noyabr ayında indeksin yüksəlməsinə "bitki yağları"nın qiymətindəki artım təsir edib, lakin "taxıl" və "şəkər" qiymətlərindəki azalma indeksin artımını qismən məhdudlaşdırıb.
"FAO Bitki Yağı Qiymətləri İndeksi" noyabr ayında aylıq əsasda 7,5 % artaraq ardıcıl II ayda böyük yüksəliş qeydə alıb və bir il əvvəlki səviyyəsindən 32 % daha yüksək olub. Qlobal palma yağı qiymətləri Cənub-Şərqi Asiyada həddindən artıq yağıntılar səbəbindən istehsal narahatlıqları ilə yüksəlib. Dünya soya yağı qiymətləri qlobal idxal tələbi ilə artdığı halda, raps və günəbaxan yağı qiymətləri qlobal təklifin azalacağı proqnozları ilə bahalaşıb.
"FAO Süd Məhsulları Qiymətləri İndeksi" tam yağlı süd tozuna olan qlobal tələbin artması nəticəsində noyabr ayında 0,6 % artaraq yuxarı meylini davam etdirib. Qərbi Avropada güclü tələbat və ehtiyatların azlığı səbəbindən kərə yağı qiymətləri yeni rekord səviyyəyə çatıb, pendir qiymətləri isə məhdud ixrac imkanları ilə yüksəlib.
Digər alt indekslərdə isə noyabr ayında azalma qeydə alınıb.
"FAO Taxıl Qiymətləri İndeksi" 2,7 % azalaraq keçən ilin göstəricisindən 8,0 % aşağı düşüb. Qlobal buğda qiymətləri zəif beynəlxalq tələbat və Cənub Yarımkürədə məhsul yığımının təklifi artırması səbəbindən azalıb. Dünya qarğıdalı qiymətləri Braziliyadakı güclü daxili tələbat və Meksikanın ABŞ-dan gələn təkliflərə marağı ilə balanslaşaraq sabit qalıb. Dünyanın digər bölgələrində müsbət hava şəraiti və Ukrayna təchizatına olan marağın azalması qiymətlərə təsir edib. Düyü qiymətləri artan bazar rəqabəti, məhsul təzyiqi və valyuta dalğalanmaları səbəbindən noyabr ayında 4,0 % azalıb.
"FAO Şəkər Qiymətləri İndeksi" noyabr ayında 2,4 % azalıb. Hindistanda və Tailandda məhsul mövsümünün başlanması, Braziliyada isə torpağın nəmliyini yaxşılaşdıran son yağıntılar gələn il üçün şəkər qamışı məhsuluna dair narahatlıqları aradan qaldırıb və bu, qiymət azalmasına səbəb olub.
"FAO Ət Qiymətləri İndeksi" noyabr ayında Avropa İttifaqında donuz əti qiymətlərinin tələbin zəifləməsi və bolluq səbəbindən 0,8 % azalıb. Dünya xırdabuynuzlu və quş əti qiymətləri bir qədər enib, beynəlxalq iribuynuzlu ət qiymətləri isə Braziliya ixrac qiymətlərinin artımının Avstraliya qiymətlərinin azalması ilə balanslaşması səbəbindən sabit qalıb.
Rəhim
