“Əl-Nəsr”in portuqal ulduz hücumçusu və kapitanı Kristiano Ronaldo keçmiş komanda yoldaşı Rafael van der Vartı kəskin cavablayıb.
Arena.az bu barədə “Maisfutebol” dərgisinə istinadən məlumat verir.
Xatırladaq ki, daha əvvəl Van der Vart bir vaxtlar “Real”da birlikdə çıxış etdiyi Ronaldo haqda fikrini açıqlayaraq, portuqal ulduzun qol vurmaq eqoizminə malik olduğunu bildirmişdi. Niderlandı keçmiş futbolçu, Ronaldonun müvafiq xüsusiyyətini həmyerlisi, keçmiş hücumçu Rud van Nistelroyla da eyniləşdirmişdi.
Öz növbəsində Ronlado Van der Varta elə bir cavab verib ki, belə desək, cavab verməsəydi daha yaxşı olardı:
“Bu oğlan kimdir ki?”, deyə Ronaldo Van der Vartı tanımadığını bildirib.
Kristiano Ronaldo 2023-cü ilin yanvar ayından “Əl-Nəsr”də çıxış edir. Portuqal ulduz ərəb klubuna 2023-cü ilin yanvarında “Mançester Yunayted”dən azad agent qismində keçib.
Ronaldonun “Əl-Nəsr”lə müqaviləsi 2025-ci ilin iyun ayının sonuna qədər qüvvədədir.
Cari mövsümdə Ronaldo “Əl-Nəsr”in heyətində 18 oyuna 15 qol və 3 məhsuldar ötürmə ilə fərqlənib.
Kristianonun “Əl-Nəsr” karyerası ümumilikdə 82 oyun, 73 qol və 18 məhsuldar ötürmədən ibarətdir.
Ronaldo “Əl-Nəsr”dən öncə “Real”, “Mançester Yunayted”, “Yuventus”, “Sportinq” (Lissabon) komandalarında çıxış edib. Portuqal ulduz bu komandaların hər biri ilə çoxsaylı qənimətlər qazanıb, müxtəlif rekordlara imza atıb. Ronaldo “Əl-Nəsr”lə də Ərəb Klublarının Çempionlar Kubokunu (2023) qazanıb, həmçinin Səudiyyə Ərəbistanı Peşəkar Liqasının 2023/2024-cü illər mövsümünün ən sərrast qolçusu (35 qol) olub.
Kristiano Portuqaliya yığmasının heyətində 215 oyuna 135 qol vurub və 45 məhsuldar ötürmə verib. Ronaldonun yığma komandanın heyətindəki oyun və qol sayı mütləq dünya rekordudur.
Ulduz futbolçu Portuqaliya yığmasının heyətində Avropa çempionatının (2016), UEFA Millətlər Liqasının (2019) qalibi, həmçinin Avropa çempionatını gümüş (2004) və bürünc (2012), FIFA Konfederasiyalar Kubokunun (2017) bürünc mükafatçısı olub.
“Transfermarkt” internet-portalı 39 yaşlı hücumçunun transfer dəyərini 15 milyon avro məbləğində qiymətləndirir.
