Suriyada müxalif qüvvələrin Dəməşq yaxınlığındakı məşhur Sednaya həbsxanasından azad etdikləri dustaqlar arasında 43 ildir həbsdə olan suriyalı pilot Rahid Əl-Tatari də olub.
Yenicag.az xəbər verir ki, bu barədə Suriya mətbuatı yazıb.
Məlumata görə, Əl-Tatari 1980-ci ildə o vaxtkı prezident Hafiz Əsədə qarşı etirazlara qalxan Həma şəhərini bombalamaq əmrindən imtina etdiyi üçün həbs olunub. Pilot 1 il sonra azadlığa çıxsa da, yenidən həbs olunub və Sednaya həbsxanasında saxlanılıb.
Qeyd edək ki, Sednaya həbsxanası Əsəd rejiminin edam və işgəncə yerlərindən biri kimi məşhurlaşıb. Suriya hüquq-müdafiə təşkilatlarının məlumatına görə, 2011-2021-ci illər ərzində həbsxanada 30 min insan ölüb.
Ötən gün Sednayada 4 mərtəbəli yeraltı həbsxana aşkarlandığı barədə məlumat yayılıb.
