İsveçdə fəaliyyət göstərən “Qobustan” Azərbaycan Ziyalıları Cəmiyyətinin təşkilatçılığı ilə “Azərbaycan rəssamlığı” mövzusunda konfrans təşkil ediləcək.
Dekabrın 14-də “Zoom” proqramı vasitəsilə keçiriləcək konfransda incəsənət elmləri üzrə professorun nəzəri bilikləri dinləniləcək və ölkəmizdən xaricdə yaşayan azərbaycanlı rəssamlar yaradıcılıqları barədə məlumat verərək, bəzi əsərlərini nümayiş etdirəcəklər.
“Qobustan” Azərbaycan Ziyalıları Cəmiyyətinin sədri Səadət Kəriminin Modern.az-a verdiyi məlumata görə, konfransın təşkilində məqsəd peşəkar rəssamlarımızı geniş izləyici auditoriyasına tanıtmaq, onların əsərlərinin mövzularını və beləliklə müasir Azərbaycan sənət dünyasının nəzəri və praktiki özəllikləri barədə danışmaq, həmçinin sənət dünyasında imkanlar, aktual məsələlər və çətinliklər barədə fikir mübadiləsi aparmaqdır.
Səadət Kəriminin sözlərinə görə, dünyanın hər guşəsində yaşayan sənətsevər dostlar “Zoom” proqramına iştirakçı, dinləyici kimi qoşula bilər.
Qeyd edək ki, İsveçdə yaşayan azərbaycanlı alim Səadət Kərimi elmlər doktoru, yazıçı, peşəkar tərcüməçidir.
