Türkiyə Ukraynada müharibəyə son qoymaq istəyir, ola bilsin, Ankaranın bununla bağlı bir düsturu var.
Teleqraf.com xəbər verir ki, bu barədə “Atlantic Council”in təhlilində deyilir.
Məqalədə qeyd olunur ki, Ukraynadakı müharibə regional mənzərəyə təsir edir. Bu, qonşu Türkiyə üçün də kritik durumdur, ona görə də atəşkəs və müharibədən sonrakı razılaşmanın formalaşmasına töhfə verməyə çalışır.
ABŞ nəşri hesab edir ki, böyük bir hərbi və diplomatik güc kimi Türkiyə Rusiyanın eskalasiyasının qarşısını almaq (Liviya və Suriyada Rusiyanı dəf etmək və ya cilovlamaq qabiliyyəti buna sübutdur) və özünü müharibədən çıxış yolu təklif edə bilən bir ölkə kimi qəbul etdirmək üçün alətlərə malikdir.
Son 30 ay ərzində Ankara həm Ukraynaya hərbi dəstək verib, həm də Rusiya və Ukrayna ilə ticarət aparıb, dialoq təşəbbüsü ilə çıxış edib, hətta buna nail də olub. Üstəgəl, Türkiyə Qara dənizdə nəqliyyatı məhdudlaşdırıb və müttəfiqlərini münaqişəni gərginləşdirə biləcək addımlar atmaqdan çəkindirib. Türklərin müharibənin cilovlanması, gərginliyin azaldılması və tez başa çatmasında böyük marağı var.
Qara dəniz təhlükəsizlik strategiyası çərçivəsində Türkiyə Rusiya, regiondakı NATO ölkələri və Qara dəniz və ya onun yaxınlığındakı NATO üzvü olmayan müttəfiqləri arasında balanslaşdırma addımları atır. Ankara həm birbaşa (Ukrayna və Azərbaycanla təhlükəsizlik sahəsində əməkdaşlığın artırılması yolu ilə), həm də dolayısı ilə (NATO-nun Cənub-Şərqini gücləndirməklə), həmçinin Moskva ilə ticarət və diplomatik əlaqələri davam etdirərək gərginliyin qarşısını almağa çalışır.
Nəşr qeyd edir ki, Türkiyə həm də Qara dəniz regionunun gələcəyi ilə bağlı ABŞ-ın maraqlarına cavab verən plan hazırlaya bilir.
Müharibənin gələcəyi ilə bağlı müzakirələr hərbi əməliyyatlar dayandırıldıqdan sonra Rusiyanın regionda hansı rol oynayacağı ilə başlamalıdır. Türkiyə və onun sülhməramlı yanaşması burada özünəməxsus dəyərə malikdir. Mənbə vurğulayır ki, Türkiyə həm də Kremlə müharibəni bitirmək üçün əsas verə bilir.
“Atlantic Council” hesab edir ki, Türkiyənin yanaşması həm rusların nə qazana biləcəyini, həm də Ukraynanın nə vaxt dayanmağa hazır olacağını əks etdirir. Türkiyənin strategiyası Ukraynanın tam məğlubiyyət şansını azaltmağa da kömək edir.
“ABŞ və Avropa strateji məsləhətləşmələri gücləndirməli, Qara dəniz regionunun gələcək təhlükəsizlik arxitekturasında Türkiyənin rolu haqqında ümumi anlayışı inkişaf etdirməli, müdafiə-sənaye və hərbi layihələri vasitəsilə onun resurslarla təmin olunmasına kömək etməlidir. Əgər bu baş verərsə, sülh, çəkindirmə və regional sabitlik perspektivləri böyük fayda verəcək”, - “Atlantic Council” analizini belə yekunlaşdırır.
