Ötən gün ABŞ-da Amerika Təchizat İdarəetmə İnstitutunun (ISM) statistik məlumatları dərc etməsi fonunda dünən axşam saatlarından dollar major valyutalar qarşısında ucuzlaşır. Dolların ucuzlaşması fonunda qızılın qiyməti bahalaşıb. Həmçinin dünən gün ərzində neft qiymətləri kəskin şəkildə ucuzlaşıb.
Çərşəmbə axşamı Amerika Təchizat İdarəetmə İnstitutu (ISM) bildirdi ki, ABŞ-ın sənaye sektorunda PMI (ISM Manufacturing) iyul ayı ilə müqayisədə avqust ayında 46.8 bənddən 47.2 bəndədək yüksəlib. Analitiklər 47.5 bəndədək artım ehtimal edirdilər. Eləcə də, “S&P Global”-ın verdiyi məlumata əsasən, ABŞ-ın Sənaye Sektorunda Biznes Aktivliyi İndeksinin 48 bəndədək geriləyəcəyi proqnoz olunsa da, göstərici 49.6 bənd səviyyəsindən 47.9 bənd səviyyəsinə qədər enib.
Həmçinin ötən gün Türkiyənin Statistika Qurumu (TÜİK) hesabatında qeyd edib ki, avqust ayına olan məlumata görə, ölkədə illik inflyasiya kəskin şəkildə yavaşlamağa davam edib və ötən ay ilə müqayisədə 61.78%-dən 51.97%-ə qədər enib. Bugün isə Yaponiyanın xidmət sektorunda PMI göstəricisi dərc olunub. Göstəricinin 54 bənd səviyyəsinə qədər artacağı ehtimal olunsa da, Biznes Aktivliyi İndeksi iyul ayında olduğu kimi, 53.7 bənd təşkil edib.
Beynəlxalq birjalarda qızılın qiyməti dünən 2475$ səviyyəsinə qədər ucuzlaşıb. Lakin, dolların ucuzlaşması fonunda dəyərli metal buradan dəstək alaraq 2495$ səviyyəsinə qədər bahalaşıb. Neftin qiyməti isə Liviya və OPEC+ ölkələrindən əlavə tədərükün olunması ehtimalları fonunda kəskin şəkildə ucuzlaşıb. “Brent” markalı neftin qiyməti ötən gün ərzində 78.5$ səviyyəsindən 74.3$ səviyyəsinə qədər enib.
Bugün Bakı vaxtı ilə saat 17:45-də Kanada Bankı (ölkənin Mərkəzi bankı) faiz qərarını açıqlayacaq. Ekspertlər tənzimləyici qurumun uçot dərəcəsini 4.50% səviyyəsindən 4.25% səviyyəsinə qədər endirəcəyini proqnozlaşdırırlar.
Gün ərzində dərc olunacaq Almaniyada, Avrozonada və Böyük Britaniyada xidmət sektorunda PMI, ABŞ-da Ticarət Saldosu, İdxal və İxrac həcmləri və əmək bazarında açıq vakansiyaların sayı (JOLTS) göstəriciləri investorların diqqət mərkəzində olacaq əsas hadisələrdir.
Bakı vaxtı ilə saat 22:00-da isə Federal Ehtiyatlar Sistemi tərəfindən ABŞ-ın 12 federal dairəsinin hər birində mövcud iqtisadi vəziyyət haqqında hesabatı özündə əks etdirən “Bej Kitab” dərc olunacaq.
Məlumat İnvest-AZ İnvestisiya Şirkətinin analitikləri tərəfindən hazırlanıb.
