İran Xarici İşlər Nazirliyi Cənubi Qafqazda mümkün geosiyasi dəyişikliklərlə bağlı narahatlığını
bildirib. Sentyabrın 2-də İran Xarici İşlər Nazirliyinin Avrasiya İdarəsinin rəhbəri Müctəba
Dəmirçilu Rusiyanın Tehrandakı səfiri Aleksey Dedov ilə görüş keçirib və görüşdə regionda
beynəlxalq səviyyədə tanınmış sərhədlərin dəyişdirilməsinin yolverilməzliyi məsələsi müzakirə
olunub.
“İRNA”-nın məlumatına görə, görüş İran tərəfinin təşəbbüsü ilə Moskvanın bu yaxınlarda
Azərbaycanı Ermənistan ərazisindən keçməklə Naxçıvanla birləşdirməli olan dəhliz layihəsini
dəstəkləməsi ilə bağlı olub. Dəmirçilu bölgədəki bütün ölkələrin “maraqları və qanuni
narahatlıqlarının” nəzərə alınmasının vacibliyini vurğulayıb.
Hər iki ölkənin diplomatları səmərəli regional əməkdaşlıq üçün ölkələrin milli suverenliyinə,
ərazi bütövlüyünə və qarşılıqlı maraqlarına hörmət edilməsinin vacibliyini bildiriblər. Görüşdə
həmçinin “3+3” regional məsləhət platformasının qarşıdan gələn iclası müzakirə olunub.
Bu arada, sentyabrın 2-də Rusiyanın xarici işlər naziri Sergey Lavrov MDBMİ-də çıxışı zamanı
Zəngəzur dəhlizinə münasibətini bildirib.
Onun sözlərinə görə, qarşıya qoyulan vəzifələrdən biri Azərbaycanın əsas hissəsi ilə Naxçıvan
arasında nəqliyyat əlaqələrinin bərpasıdır. “2020-ci il noyabrın 9-da prezidentlər Putin, Əliyev və
baş nazir Paşinyan tərəfindən imzalanan sənəddə deyilir ki, həm dəmir yolu, həm də avtomobil
yolu ilə hərəkət bərpa olunacaq. Və o, Rusiya Federal Təhlükəsizlik Xidmətinin sərhəd
qoşunlarının təmin etdiyi təhlükəsizliklə bərpa olunacaq”, - deyə Lavrov bildirib.
Almaz Həsənli
