Lənkəranda məscidinin imam müavinini öldürməyə cəhddə təqsirləndirilən Çingiz Əlizadənin barəsindəki qərardan dövlət ittihamçısı tərəfindən verilən kassasiya protesti və kassasiya şikayəti üzrə məhkəmə iclası başa çatıb.
Pravda.az-ın əldə etdiyi məlumata görə, Ali Məhkəmənin hakimi Tahir Kazımovun sədrliyi ilə keçirilən prosesdə qərar elan olunub.
Qərara əsasən, protest təmin edilməyib, şikayət isə qismən təmin olunub, Şirvan Apellyasiya Məhkəməsinin çıxardığı qərar dəyişdirilib. Məhkumun Cinayət Məcəlləsinin (CM) 29, 120.1-ci (qəsdən adam öldürməyə cəhd) maddəsi ilə təyin edilmiş azadlıqdan məhrumetmə cəzasının müddəti 10 ildən 7 il 10 ay 15 günə endirilib.
İttihama görə, hadisə 2022-ci ilin sentyabr ayında rayonun Lüvəsər kənd məscidində baş verib. Belə ki, kənd sakini Ç.Əlizadə səhər saatlarında sübh namazı zamanı məscidin imam müavinini, 1985-ci il təvəllüdlü Taleh Əliyevə çoxsaylı bıçaq zərbələri endirib.
Buna səbəb T.Əliyevin məsciddə islam dininin təbliği ilə bağlı ziddiyyətli məqamlara dair söylədiyi fikirlərə özünün dini mövzuda daha çox biliyə malik olduğunu hesab edərək qəti şəkildə qarşı çıxması olub. O, zərərçəkmiş şəxsin din xadimi kimi insanları yanlış məlumatlandırdığını hesab edərək, məsələni ikilikdə həll edib. Sonra Çingiz evdən götürüb üzərində gətirdiyi bıçaqla din xadiminə 3 zərbə endirərək ona ağır bədən xəsarəti yetirib.
Xəstəxanaya çatdırılan yaralının həyatını xilas etmək mümkün olub.
Lənkəran Ağır Cinayətlər Məhkəməsinin hökmü ilə Ç.Əlizadə Cinayət Məcəlləsinin 29, 120.2.2 (xuliqanlıq niyyəti ilə adam öldürməyə cəhd) maddəsi ilə təqsirli bilinərək 14 il 6 ay müddətinə azadlıqdan məhrum edilib. Hökmdən narazı qalan müdafiə tərəfi apellyasiya şikayəti verib. Şirvan Apellyasiya Məhkəməsinin qərarına əsasən, məhkumun əməlini CM-in 29, 120.2.2-ci maddəsindən CM-in 29, 120.1-ci maddəsinə tövsif edilib və onun cəzasını 10 ilə endirmişdi. Daha sonra dövlət ittihamçısı kassasiya protesti və təqsirləndirilən şəxs isə kassasiya şikayəti vermişdi.
Kamal Məmmədov
