"Google” istifadəçiləri İstanbul hava limanını “Avropanın ən yaxşısı” seçiblər.
SİA-nın türk saytlarından əldə etdiyi məlumata görə, İstanbul Hava Limanı operatoru - İGA-nın Baş icraçı direktoru (CEO) Səlahəddin Bilgen “Google” istifadəçilərinin şərhləri əsasında aparılan araşdırmaya görə, İstanbul Hava Limanının “Avropanın ən yaxşı hava limanı” seçildiyini açıqlayıb.
S.Bilgen sosial media hesabında yazıb: "Google” şərhlərində də göründüyü kimi, bizi seçən və uğurlarımıza töhfə verən hər kəsə dərin minnətdarlığımızı bildiririk. İstanbul Hava Limanını Avropanın ən yaxşısı etdiyinə görə təşəkkür edirik."
Avropa hava limanları arasında “Google” istifadəçilərinin münasibətləri üzərində aparılan araşdırmanın nəticələrinə əsasən, 100 mindən çox “Google” şərhinə görə İstanbul Hava Limanı 4,4 balla birinci yerdə qərarlaşıb. Ondan sonra Porto, Afina, Çexiya və Sürix hava limanları gəlir.
