Sentyabrın 23-də Xankəndidə 4 nömrəli məktəbdə ilk dərs günü təşkil olunacaq

"Ötən bir il ərzində Qarabağ Regional Təhsil İdarəsinin tabeliyində fəaliyyət göstərən Füzuli şəhər Mirzə Uluqbəy adına 1 nömrəli tam orta məktəb, Ağdərə rayonu Talış kənd tam orta məktəb və Talış kənd körpələr evi-uşaq bağçası istifadəyə verilib. İki gün əvvəl isə Prezident İlham Əliyevin iştirakı ilə Xankəndi şəhər Nizami Gəncəvi adına 4 nömrəli tam orta məktəbin açılışı olub. Sentyabrın 23-də Xankəndi şəhər Nizami Gəncəvi adına 4 nömrəli tam orta məktəbdə ilk dərs günü təşkil olunacaq".

525.az APA-ya istinadən xəbər verir ki, bu sözləri jurnalistlərə müsahibəsində Qarabağ Regional Təhsil İdarəsinin müdiri vəzifəsini icra edən Anar Məcidov deyib.

O, həmçinin qeyd edib ki, 624 şagird yerlik məktəbə 296 nəfər şagird qeydiyyatdan keçib. 57 nəfər şagird isə gözləmədədir. Bu o deməkdir ki, yaxın günlərdə biz o şagirdləri məktəbə və təhsilə cəlb ediləcək. Bundan başqa Xankəndi şəhər 4 nömrəli tam orta məktəbdə müəllim kollektivinin formalaşması da başa çatmaq üzrədir:

"Məktəbin direktoru müəyyənləşib və rəsmiləşdirilib. Elm və Təhsil Nazirliyinin Məktəbəqədər və Ümumi Təhsil üzrə Dövlət Agentliyinin dəstəyi ilə biz işğaldan azad olunmuş bütün ərazilərdə, o cümlədən Xankəndi şəhər 4 nömrəli tam orta məktəbdə bilik və bacarıqları ən yüksək səviyyədə olan müəllimləri seçərək işə qəbul etmişik. İnanırıq ki, biz şəhidlərimizin canı, qazilərimizin qanı hesabına başa gələn bu böyük qələbəyə yüksək təhsilimizlə cavab verəcəyik. Yaxın illərdə Xankəndi şəhər 4 nömrəli tam orta məktəb öz uğurları ilə bütün Azərbaycanı sevindirək”, - deyə A.Məcidov əlavə edib.

Sonda A.Məcidov onu da qeyd edib ki, Xankəndi şəhəri ilə bərabər Kərkicahan qəsəbəsində 1 nömrəli tam orta məktəb və uşaq bağçası da hazır vəziyyətə gətirilib. Yaxın gələcəkdə həmin təhsil müəssisələrinin də açılması planlaşdırılır.






















Bizi İnstagramda izləyin