Böyük Britaniyanın keçmiş baş naziri Boris Consonun memuarlarında kraliça II Yelizavetadan aldığı beynəlxalq münasibətlər barədə bir məsləhət qeyd olunub.
İqtisadiyyat.az xəbər verir ki, kitabdan bu parçanı "Daily Mail" dərc edib.
Conson xatırlayır ki, kraliçaya Hindistanla çətin danışıqlardan bəhs edib. Böyük Britaniya Hindistanı Rusiyaya qarşı daha sərt siyasət yürütməyə inandırmağa çalışıb, lakin bu ideya Hindistan hökuməti tərəfindən maraqla qarşılanmayıb.
Consonu təəccübləndirən odur ki, II Yelizaveta bunun səbəbini izah edə bilib. O, Hindistanın ilk baş naziri Cəvahirləl Nehru ilə söhbətlərini xatırladıb. Kraliçanın sözlərinə görə, Nehru hələ 1950-ci illərdə ona deyib ki, Hindistan həmişə Rusiyanın tərəfində olacaq.
“Bu gün mənim formal istefam günündə biz başqa məsələlərlə yanaşı, Ukrayna haqqında danışdıq. Mən hindistanlı dostlarımızı Rusiyaya qarşı daha sərt siyasət yürütməyə inandırmağa çalışarkən qarşılaşdığımız çətinlikləri qeyd etdim. O, Hindistanın keçmiş baş naziri Cəvahirləl Nehrunun 1950-ci illərdə ona bunu dediyini xatırladı. O mənə dedi ki, Hindistan həmişə Rusiyanın tərəfində olacaq və bəzi şeylər heç vaxt dəyişməyəcək. Onlar belə formalaşıblar”,-deyə Boris Consonun xatirələrində qeyd edilir.
