Azərbaycanda səfərdə olan Macarıstanın Kənd Təsərrüfatı və Təbiət Elmləri Universiteti (MATE) rektoru Çaba Gurica ilə “Agro dairy” şirkətinin bitkiçilik istiqaməti üzrə icra direktoru Ramil Məmmədov birgə əməkdaşlıq haqqında memorandum imzalayıblar.
APA-nın yerli bürosunun məlumatına görə, Samux şəhəri Heydər Əliyev Mərkəzində keçirilən brifinqdə Macarıstanın ölkəmizdəki fövqəladə və səlahiyyətli səfiri Tamaş Yojef Torman və Macarıstanın Kənd Təsərrüfatı və Təbiət Elmləri Universitetinin rektoru Çaba Gurica “Agro dairy” şirkəti ilə birgə əməkdaşlığın hər iki ölkənin kənd təsərrüfatının inkişafına mühüm töhfələr verəcəyini diqqətə çatdırıblar. Həmçinin, brifinqdə MATE-nin tədris bazası, elmi-tədqiqat sahəsində həyata keçirdiyi işlər və təcrübə imkanları barədə də məlumat verilib.
Daha sonra qonaqlar “Agro dairy” şirkətinin Samux rayonu ərazisində yerləşən əkin sahələrinə baş çəkiblər.
