Bakı İqlim Fəaliyyəti Həftəsi (BCAW) COP29 ərəfəsində ambisiyalı öhdəliklər və innovativ təşəbbüslərlə yekunlaşıb və qlobal iqlim fəaliyyəti çərçivəsində Azərbaycanın lider mövqeyini daha da möhkəmləndirib. Cari ilin 30 sentyabrından 4 oktyabr tarixinə kimi davam edən bir həftəlik toplantıda 700-dən çox nümayəndənin iştirakı ilə 30-dan çox tədbir keçirilib. Beynəlxalq iqlim ekspertləri, hökumət rəsmiləri, gənclər və özəl sektor liderlərini bir araya gətirən bu tədbirlərdə “yaşıl” maliyyə, ədalətli keçid, metan emissiyalarının azaldılması, su və dayanıqlı qida sistemləri, eləcə də digər mövzular müzakirə olunub.
Fins.az xəbər verir ki, diqqəti cəlb edən əsas məqamlara Qabaqcıl Gündəlik çərçivəsində ilk müstəqil kənd təsərrüfatı hesabatının təqdim edilməsi daxildir. Birləşmiş Krallığın Xarici İşlər, Birlik və İnkişaf Nazirliyi (FCDO) və BMT-nin İqlim üzrə yüksək səviyyəli çempionu ilə tərəfdaşlıq çərçivəsində Kənd təsərrüfatında beynəlxalq elmi araşdırmalar üzrə Məşvərət qrupunun (CGIAR) rəhbərliyi ilə hazırlanmış bu hesabatda qlobal iqlim məqsədlərini dəstəkləmək üçün kənd təsərrüfatı sektorunun transformasiyası baxımından tələb olunan mühüm addımlar təsvir olunub. Hesabat Beynəlxalq Enerji Agentliyi və İqlim üzrə yüksək səviyyəli çempionlar tərəfindən bu yaxınlarda dərc edilmiş Qabaqcıl Gündəlik Hesabatını tamamlayır və qida təhlükəsizliyi, innovasiya, eləcə də davamlılığı təmin etməklə, kənd təsərrüfatının dekarbonizasiyası üzrə strategiyaları ön plana çəkir. Sözügedən hesabat kənd təsərrüfatı sənayesində dayanıqlı təcrübələrin geniş tətbiqi üçün mühüm mənbədir.
Gənclərin də iştirakını təşviq etmək məqsədilə Bakı İqlim Fəaliyyəti Həftəsi çərçivəsində “İqlim dəyişməsi üzrə Universitetlər şəbəkəsi” təşəbbüsünə start verilib. Bu, gələcək nəslin iqlim həlləri və keçid səylərində fəal rol oynamasına imkan yaratmaq üçün nəzərdə tutulmuş yeni platformadır.
Gənclərin iqlim fəaliyyətində iştirak etməsinin vacib olduğunu bir daha vurğulayan “Dayanıqlı Gələcək: Gənclərin Yaşıl İnnovasiyaları” tədbiri gənc sahibkarlara öz “yaşıl” innovasiyalarını potensial investorlara təqdim etmək üçün platforma yaradıb. Gün ərzində iqlim problemlərinin həllinə yönəlmiş dayanıqlı ideyalarını təqdim edən gənc liderlərdən ibarət üç komanda uğurlu layihələrə görə yüksək mükafata layiq görülüb. Beləliklə, Azərbaycan Respublikasının Kiçik və Orta Biznesin İnkişafı Agentliyi (KOBİA) və Azərbaycan Respublikası Elm və Təhsil Nazirliyinin tərəfdaşlığı ilə keçirilən bu tədbir “yaşıl” innovasiyaların idarə edilməsində Azərbaycan gənclərinin dinamik rolunu nümayiş etdirib.
İncəsənət, mədəniyyət və iqlim arasındakı əlaqəni vurğulayan Bakı İqlim Fəaliyyəti Həftəsində tanınmış fotojurnalist Reza Deqati və “The Landmark” oteli ilə tərəfdaşlıq çərçivəsində R. Deqatinin Bakı şəhərinin mühüm transformasiyasını əks etdirən “Caspian Dreams” adlı fotosərgisinə baxış keçirilib.
Həftə iqlim dəyişməsi, sağlamlıq, rifah və aktiv həyat tərzi arasında əlaqəni vurğulayan Bakı Bulvarı boyu “Walk the Talk” (“Təbliğ etdiyini tətbiq et”) iqlim fəaliyyəti yürüşü ilə yekunlaşıb.
Bakı İqlim Fəaliyyəti Həftəsinin uğuru gələn il Rio-de-Janeyro şəhərində oxşar səylərin həyata keçirilməsinə ilham vermiş oldu. Rio İqlim Fəaliyyəti Həftəsinin (#RCAW) 2025-ci ilin noyabrında Braziliyanın Belem şəhərində keçiriləcək COP30-dan əvvəl həyata keçirilməsinə dair müzakirələr davam edir.
Rio-de-Janeyro şəhərinin meri Eduardo Paes qeyd edib: “Bakı kimi Rio-de-Janeyro da daha yaşıl gələcəyin təqdim etdiyi imkanlardan istifadə etməklə yanaşı, iqlim dəyişməsinə qarşı təcili tədbirlərin vacibliyini də dərk edir. Mən Bakının təhlükəsiz, dayanıqlı və davamlı gələcəyin formalaşdırılmasına kömək etmək üçün şəhər, biznes və icmaları bir araya gətirən Bakı İqlim Fəaliyyəti Həftəsinə ev sahibliyi etmək təşəbbüsünü yüksək qiymətləndirirəm. Rio şəhəri yaşıl keçidi sürətləndirmək və COP29-dan Braziliyada keçiriləcək COP30-a körpü salmaqda estafeti qardaş Bakı şəhərindən almağı səbirsizliklə gözləyir.”
Bakı İqlim Fəaliyyət Həftəsində (BCAW) əldə olunan iddialı nəticələr və əməkdaşlıq əlaqələri Azərbaycanın iqlim fəaliyyətində qlobal lider mövqeyini bir daha təsdiqləyib.
Beləliklə, BCAW noyabrda keçiriləcək COP29 çərçivəsində Azərbaycanın ambisiyaları artırması və fəaliyyətə təkan verməsi üçün münbit zəmin yaradıb.
Ətraflı məlumat: //bakuclimateactionweek.org/az/main
* * *
Cari ilin 11-22 noyabr tarixləri arasında Bakıda keçiriləcək COP29 konfransı ərəfəsində ölkəyə səfər edəcək şəxslərə “Azərbaycan Hava Yolları” (AZAL) tərəfindən xüsusi endirimlər təklif edilir.
Belə ki, kampaniya çərçivəsində COP29 ərəfəsində Bakıya səfər etmək niyyətində olan şəxslər AZAL-ın biznes, premium ekonom və ekonom siniflərindən olan aviabiletlərini 10% endirimlə əldə edə biləcəklər. Endirimdən yararlanmaq istəyənlər AZAL-ın rəsmi veb-saytı və ya mobil tətbiqi vasitəsilə aviabilet alışı zamanı VISITCOP29 promokodundan istifadə etməlidirlər.
Güzəştlərdən AZAL-ın bütün beynəlxalq müntəzəm reysləri üzrə səyahət edən və yaşı 18-dən yuxarı olan şəxslər yararlana bilərlər. Endirimli aviabiletləri 08 noyabr 2024-cü il tarixinədək əldə etmək mümkündür. Qeyd edək ki, güzəştli aviabiletlər yalnız bu ilin 1 noyabr – 1 dekabr tarixləri arasında həyata keçiriləcək uçuşlara şamil olunur.
* * *
Azərbaycanda keçiriləcək Birləşmiş Millətlər Təşkilatının İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyası (COP29) çərçivəsində baş tutacaq tədbirlərdə BMT-nin altı rəsmi dilinə tərcümə olacaq.
Fins.az-ın məlumatına görə, bununla bağlı məsələ Milli Məclisin oktyabrın 8-də keçiriləcək plenar iclasının gündəliyinə daxil edilən “Azərbaycan Respublikası Hökuməti ilə Birləşmiş Millətlər Təşkilatının İqlim Dəyişmələri üzrə Çərçivə Konvensiyasının, Kioto Protokolunun və Paris Sazişinin Katibliyi arasında Birləşmiş Millətlər Təşkilatının İqlim Dəyişmələri üzrə Çərçivə Konvensiyasının Tərəflər Konfransının iyirmi doqquzuncu sessiyası, Kioto Protokolunun Tərəflər Görüşünün on doqquzuncu sessiyası, Paris Sazişinin Tərəflər Görüşünün altıncı sessiyası və Köməkçi Orqanların sessiyaları haqqında Saziş”də əksini tapıb.
BMT-nin altı rəsmi dil kimi Çin, ərəb, fransız, ingilis, ispan və rus dilləridə tərcümə təmin ediləcək.
Xatırladaq ki, BMT-nin İqlim Dəyişikliyi üzrə Çərçivə Konvensiyasının (COP29) Tərəflər Konfransının 29-cu sessiyası bu ilin noyabrında Azərbaycanda keçiriləcək. Bununla bağlı qərar ötən il dekabrın 11-də Dubayda keçirilən COP28 plenar iclasında qəbul edilib. İki həftə ərzində dünyanın mərkəzinə çevrilən Bakı 70-80 minə yaxın xarici qonaq qəbul edəcək.
* * *
COP29 konfrans ərazisində ibadət və meditasiya otaqları təşkil ediləcək.
Fins.az-ın məlumatına görə, bununla bağlı məsələ Milli Məclisin oktyabrın 8-də keçiriləcək plenar iclasının gündəliyinə daxil edilən “Azərbaycan Respublikası Hökuməti ilə Birləşmiş Millətlər Təşkilatının İqlim Dəyişmələri üzrə Çərçivə Konvensiyasının, Kioto Protokolunun və Paris Sazişinin Katibliyi arasında Birləşmiş Millətlər Təşkilatının İqlim Dəyişmələri üzrə Çərçivə Konvensiyasının Tərəflər Konfransının iyirmi doqquzuncu sessiyası, Kioto Protokolunun Tərəflər Görüşünün on doqquzuncu sessiyası, Paris Sazişinin Tərəflər Görüşünün altıncı sessiyası və Köməkçi Orqanların sessiyaları haqqında Saziş”də əskini tapıb.
Bununla yanaşı ərazidə lazmi avadanlıqlar və ləvazimatlarla təmin olunmuş olunmuş körpə baxım otağı, açıq havada mühafizə perimetri daxilində siqaret çəkmək üçün məntəqələr olacaq.
Xatırladaq ki, BMT-nin İqlim Dəyişikliyi üzrə Çərçivə Konvensiyasının (COP29) Tərəflər Konfransının 29-cu sessiyası bu ilin noyabrında Azərbaycanda keçiriləcək. Bununla bağlı qərar ötən il dekabrın 11-də Dubayda keçirilən COP28 plenar iclasında qəbul edilib. İki həftə ərzində dünyanın mərkəzinə çevrilən Bakı 70-80 minə yaxın xarici qonaq qəbul edəcək.
* * *
Beynəlxalq Bərpa Olunan Enerji Agentliyi (IRENA) Bakıda keçiriləcək Pre-COP29-da 2030-cu ilə qədər dünya üzrə Bərpa olunan enerji mənbələrinin (BEM) güclərinin 3 dəfə və enerji səmərəliliyinin 2 dəfə artırılması üzrə işlərin gedişi barədə rəsmi hesabat təqdim etməyi planlaşdırır.
Fins.az xəbər verir ki, bu barədə IRENA "X" sosial şəbəkəsində məlumat yayıb.
"BƏƏ-də COP28-də əldə edilmiş enerji hədəflərinə nail olmaqda irəliləyişin izlənməsinə cavabdeh olan IRENA və tərəfdaşları Pre-COP29-da Bakıda bərpa olunan enerji güclərinin 3 dəfə artırılması və enerji səmərəliliyinin 2 dəfə artırılması üzrə işlərin gedişi barədə rəsmi hesabat təqdim edəcək", - məlumatda qeyd olunub.
Qeyd edək ki, Bakıda oktyabrın 10-11-də Pre-COP29 baş tutacaq, noyabrın 11-22-də isə BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyası (COP29) keçiriləcək.
