Emin Mahmudovun klub karyerası yolunda getmir.
"8 nömrə" son bir ayda cəmi 1 rəsmi görüşə çıxıb. O da 75 dəqiqə.
Öncə kapitanlıq sarğısı əlindən alındı, ardınca heyətdən çıxarıldı.
Adını isə qoydular ki, Mahmudov zədəlidir.
7 ildir şərəfini qoruduğu "Neftçi"də üzləşdiyi xoşagəlməz gedişatda sabiq kapitanın dadına Fernandu Santuş çatdı.
1 aydı yaşıl meydanlara həsrət qalan, zədədən əziyyət çəkən futbolçunu milli komandaya dəvət etməklə.
"Neftçi"də olanlardan fərqli olaraq portuqaliyalı yaxşı bilir ki, bu gün ölkədə Emindən güclü yerli futbolçu yoxdur. Hətta bu qədər problemlərinə rəğmən.
Sitat: "Emin keyfiyyətli futbolçudur. Bəzi keyfiyyətlərə malikdir ki, hər futbolçuda bu yoxdur. Elə qərarlar verə bilər ki, hər oyunçu bunu edə bilmir. Tibb heyətindən məlumat verilib ki, Eminin heç bir zədəsi yoxdur".
Santuş siyahıda Eminə yer verməklə təkcə kapitana sahib çıxmadı.
O, həm də bir cümlə ilə "Neftçi"nin yalanını ifşa etdi.
Bəs deyirdilər o, zədədən əziyyət çəkir?
XANOĞLAN İMANOV
