ABŞ Dövlət katibi Entoni Blinken ötən gün Gürcüstanda keçirilən parlament seçkiləri ilə bağlı bəyanat yayıb.
“Qafqazinfo” xəbər verir ki, Dövlət departamentinin saytında yerləşdirilən bəyanatda Blinken Gürcüstanın siyasi liderlərinə çağırış edib.
Onun sözlərinə görə, beynəlxalq müşahidəçilər nəticələri azad və ədalətli adlandırmayıb: “Beynəlxalq normaların pozulması ilə bağlı bütün halları qınayırıq, beynəlxalq və yerli müşahidəçilərin seçkilərlə bağlı pozuntulara dair bütün məlumatların tam araşdırılması ilə bağlı çağırışlarına qoşuluruq. Gürcüstanın siyasi liderlərini qanunun aliliyinə hörmət etməyə, fundamental azadlıqlara xələl gətirən qanunvericiliyi ləğv etməyə və seçki prosesindəki çatışmazlıqları birlikdə aradan qaldırmağa çağırırıq”.
Blinken, həmçinin qeyd edib ki, Gürcüstan konstitusiyasında yer alan ölkənin Avropa və Avro-Atlantik inteqrasiyası məqsədləri hökumətin vətəndaş cəmiyyəti üzvlərinin hüquqlarına və bütün Gürcüstan vətəndaşlarının fundamental azadlıqlarına hörmətlə yanaşmağı tələb edir.
Xatırladaq ki, oktyabrın 26-da Gürcüstanda parlament seçkiləri keçirilib. Ölkənin Mərkəzi Seçki Komissiyasının ən sən məlumatına görə, hakim “Gürcü arzusu” partiyası 54,08 faiz səslə qalib gəlib.
