İkinci sülh sammiti Hindistanda keçirilə bilər. Kiyev Ukrayna formatı əsasında müharibəni dayandırmaq üçün digər ölkələrin təkliflərini dinləməyə hazırdır. SİA bu barədə Ukrayna Prezidenti Volodimir Zelenskinin “The Times of India” qəzetinə müsahibəsində yer alan bəyanatlarına istinadla xəbər verir.
Ukrayna Prezidenti deyib: “Biz Narendra Modi ilə danışdıq. Bizim sülh sammiti platformamız var, inanıram ki, ikinci forumu istənilən mötəbər paytaxtda keçirə bilərik. Təbii ki, bu, Hindistanda baş verə bilər və Baş nazirin buna uyğun olaraq sammit təşkil edəcəyi mümkündür”.
V. Zelenski əlavə edib ki, Ukrayna sülh sammitinin növbəti görüşünə hazırlaşmalıdır. Eyni zamanda, Kiyev müxtəlif ölkələrdən, o cümlədən Çin, Braziliya, Hindistan, Avropa İttifaqının üzvləri və ya Afrika qitəsi dövlətlərindən müxtəlif təklifləri eşitmək istəyir. O əlavə edib: “Lütfən, əgər Çin və Braziliyanın təklifləri varsa, dinləməyə hazırıq, ancaq Kiyevin formatına əsaslanmalıdır, çünki biz müharibə şəraitindəyik. İnanıram ki, belə bir sammit Hindistanda baş tuta bilər”.
Qeyd edək ki, Ukrayna Prezidentinin ofisi birgə sülh planı razılaşdırıldıqdan sonra ikinci sülh sammitinin baş tutacağını açıqlayıb. Buraya Ukrayna tərəfinin təklif etdiyi “Sülh formulu”nun 10 bəndi daxildir.
