Müəllimlərin iş yerinin dəyişdirilməsi müsabiqəsində 1015 nəfər uğur qazanaraq iş yerini dəyişdirməyə nail olub.
Reyting.az-ın xəbərinə görə, bunu Məktəbəqədər və Ümumi Təhsil üzrə Dövlət Agentliyinin (MÜTDA) direktoru Eşqi Bağırov hesabat brifinqində bildirib.
Onun sözlərinə görə, müəllimlərin iş yerinin qarşılıqlı dəyişdirilməsi prosesində 210 müəllim uğur qazanaraq iş yerini qarşılıqlı dəyişdirib. Direktorların işə qəbulu müsabiqəsində isə 84 nəfər uğur qazanıb, 141-i yerdəyişmə edib, hazırda 1027 nəfərin müsahibəsi davam edir.
E. Bağırov əlavə edib ki, bu il keçirilən sertifikatlaşdırmada 24 mindən çox insan iştirak edib, onlardan 20 104 nəfəri uğur qazanıb. Minimum tələbi ödəməyib növbəti il təkrar sertifikatlaşdırmaya 3 946 nəfər cəlb olunacaq: "Ümumilikdə indiyədək 55 000 müəllim sertifikatlaşdırmadan keçərək əməkhaqqısını artımla alır. Tamamlanmış imtahanlar üzrə müəllimlərin orta dərs yükü 17.5-dən 19.5-ə qalxıb".
