Son günlər güclü yağışlar səbəbindən Bakının Badamdar qəsəbəsi ərazisində qaya parçaları uçqun təhlükəsi yaratdı. Nəticədə Bakı Kənar Dairəvi yolu bağlandı. Yol yalnız uçqun təhlükəsinin aradan qaldırılması üçün aidiyyəti dövlət qurumları tərəfindən müvafiq tədbirlər görüldükdən sonra açıldı.
Amma ərazidə təhlükəli vəziyyət aradan qalxmayıb. Məsələ burasındadır ki, uçqun təhlükəsinin yarandığı ərazidə məktəb binası da var. Aylardır Bakupost.az təhlükəli ərazidə yerləşən, heç bir təxliyyə çıxışı olmayan məktəblə bağlı yazılar dərc etsə də, şagirdlərin həyatının təhlükə altında olduğunu bildirsə də, təəssüf ki, hələ də məsələ ilə bağlı tədbir görülməyib.
Söhbət Badamdar qəsəbəsində yerləşən və yolu olmadığı üçün neçə vaxtdır sakinlərin narahatlığına səbəb olan qalmaqallı Laçın qaçqın məktəbindən gedir.
Sözügedən yolsuz məktəb vaxtilə gecə ikən tikilib və Badamdarda düz qayanın üstündə yerləşir. Uçqunun baş verdiyi ərazi məktəbin arxa tərəfindədir. Uçurumun üstündə yerləşən məktəbin ön tərəfdən olan yeganə yolu isə Badamdar qəsəbəsi 1-ci massiv, Topçubaşov küçəsi, 246 ünvanında yaşayan sakinlərin həyətindən keçir. Bu isə sakinlərlə məktəbin direktoru Piyalə Xudayarova arasında tez-tez qarşıdurma yaşanır. Belə ki, vaxtilə məktəbin yolu digər istiqamətdən olub. Lakin orada yeni bina tikildiyindən məktəb yolsuz qalıb. Sakinlər humanizm naminə piyada getmək şərtilə müəllim və şagirdlərə öz həyətlərindən yol veriblər. Lakin bir neçə il sonra direktor və müəllimlər məktəbə onsuz da dar olan həmin yoldan maşınla gedib-gəlməyə başlayıblar. Sakinlərin qapısı birbaşa küçəyə açıldığı üçün dalandan avtomobil yolu kimi istifadə olunması azyaşlı uşaqların həyatına təhlükə yaradır.
Dövlət Şəhərsalma və Arxitektura Komitəsi yanında Bakı Şəhər Memarlıq və Şəhərsalma Baş İdarəsi Bakupost.az -ın sorğusuna cavab olaraq, həmin ərazidə məktəb binasının fəaliyyətinin qanunsuz olduğunu bildirib:
"Əməkdaşlarımız tərəfindən yerində baxış zamanı Səbail rayonu, 1-ci massiv, Topçubaşov küçəsi, ev 246 ünvanında müvafiq icazə və razılaşdırma sənədləri olmadan uzun müddət öncə 250 kvadrat metr sahədə inşa edilmiş 1 mərtəbəli 2 ədəd tikili müşahidə olunmuşdur".
Dövlət Şəhərsalma və Arxitektura Komitəsi yanında Bakı Şəhər Memarlıq və Şəhərsalma Baş İdarəsinin rəisi Read Qasımov məsələ ilə bağlı Səbail rayon İcra Hakimiyyətinin başçısı Vüqar Zeynalov və Fövqəladə Hallar Nazirliyi Tikintidə Təhlükəsizliyə Nəzarət Dövlət Agentliyinin rəisi Cəbrayıl Xanlarova müraciət edərək, müvafiq tədbirlərin görülməsini xahiş edib. Ancaq İdarə rəisinin müraciətindən aylar keçsə də, məsələnin həllindən xəbər-ətər yoxdur.
Yalnız dünən, oktyabrın 30-da Fövqəladə Hallar Nazirliyinin Tikintidə Təhlükəsizliyə Nəzarət Dövlət Agentliyindən Bakupost.az -a məsələ ilə bağlı məktub göndərilib. Agentliyin rəis müavini Zemfira Rzayevə sorğumuza cavab olaraq, bildirib ki, qeyd olunan ünvanda uzun illər əvvəl inşa edilmiş və "Laçın" məktəbi adı ilə fəaliyyət göstərən məktəb binası və onun istismara qəbul edilməsi barədə Agentlikdə məlumat yoxdur:
"Bildiririk ki, qeyd olunan qanunsuz tikililər ilə bağlı inzibati icraat yerli icra hakimiyyəti orqanlarının səlahiyyətlərinə aid olduğundan, eyni zamanda, həmin tikililərlə bağlı qanunvericilikdə nəzərdə tutulmuş qaydada və müddətdə Agentliyə məlumat daxil olmadığından, tərəfimizdən hər hansı tədbirin görülməsi mümkün olmamışdır".
Göründüyü kimi, Agentlik də məsələnin həlli ilə bağlı Səbail Rayon İcra Hakimiyyətinin tədbir görməli olduğunu bildirir. Lakin həm Dövlət Şəhərsalma və Arxitektura Komitəsi yanında Bakı Şəhər Memarlıq və Şəhərsalma Baş İdarəsinin rəisi Read Qasımov icra hakimiyyətinə müvafiq məktub ünvanlasa, həm də sakinlər dəfələrlə müraciət etsələr də, nədənsə bunun nəticəsi olmayıb. Məsələnin həllinə cavabdeh olan Səbail Rayon İcra Hakimiyyəti məktəbin başqa əraziyə köçürülməsi ilə əlaqədar tədbir görməyə tələsmir.
Ancaq Badamdarda baş verən son üçqun hadisəsi bir daha göstərdi ki, növbəti yağışlar zamanı məktəb binası da Dairəvi Yola doğru sürüşə, şagirdlərin və məktəbdə çalışanların başına bədbəxt hadisələr gələ bilər. İş burasındadır ki, məktəbin təxliyyə çıxışı da yoxdur. Bu səbəbdən sürüşmə, yanğın və s. kimi bədbəxt hadisələr baş verdikdə, şagirdlərin təxliyyəsi də çox çətin olacaq.
Beləliklə, qarşıdan qış gəlir və "Laçın" qaçqın məktəbi ilə bağlı məsələ təcili həllini tələb edir. Biz bir daha bu barədə yazıb, aidiyyatı qurumları məsələdən xəbərdar etdik. Tədbir görmək vəzifəsi isə onların üzərinə düşür.
Sonda onu da qeyd edək ki, ərazidə çəkilən son görüntülər də "Laçın" qaçqın məktəbi ilə bağlı təhlükənin nə dərəcədə real olduğunu əks etdirir.
Həmin fotoları təqdim edirik:
Zaur
BakuPost
