Deyəsən, xüsusilə “Neftçi” azarkeşlərinin Emin Mahmudovla bağlı narahatlığı başa çatmaq üzrədi. Axı Samir Abasovun baş məşqçi postuna gəlişindən sonra keçirilən hər iki oyunda sabiq kapitan start heyətində meydana çıxıb və sonadək top qovub.
Əslində hadisələrin axarı bizə tanışdı. Elə Roman Qriqorçuk da “ağ-qaralar”ı meydana çıxardığı ilk üç oyunda Emini “dişinə çəkdi”. Daha doğrusu, birinci matçda 83 dəqiqə meydanda olan futbolçu ikinci və üçüncü görüşlərdə 90 dəqiqə şans qazandı. Özü də kapitan sarğısıyla. Ardınca Mahmudovun ümidləri doğrultmadığını gördük ki, futbolçu həm bazübəndi əldən verdi, həm də start heyətindəki yerini. Vacib bir məqamı da unutmayaq. Qriqorçuk “Neftçi”nin “Zirə”nin qonağı olduğu 6-cı tur matçında Eminə ikinci dəfə şans verdi. Bəli-bəli, kapitan kimi. Lakin bu dəfə də nəsə dəyişmədi. Həm komanda uduzdu (0:2), həm də Mahmudov çox süst oyun keçirdi. İndi həmin hadisələr təkrarlanır. Bir fərqlə ki, bu dəfə Mahmudov sarğısızdı. Və onu qaytarmaq üçün çox əlləşməli-vuruşmalı olacaq. Bu prosesə start verilibmi? Bəli.
Elə “dünənə qədər” təcrübəli futbolçunun karyerasını bitirəcəyi və ya Türkiyənin 1-ci liqa klublarıyla anlaşacağı haqda söz-söhbət eşidirdik. İndi vəziyyət fərqlidi. Emin Samir Abasovun rəhbərliyi altında çıxdığı matçlarda sözün əsl mənasında can qoyur. İstər qapıya zərbələr, istərsə də yaxşı oyunu ilə diqqəti çəkir ki, məqsədini də büruzə verir: kapitan sarğısına qovuşmaq. Təbii ki, bunun baş verib-verməməsi Samir Abasovdan yox, elə Eminin özündən asılıdı. O, bazübəndi, necə deyərlər, dişiylə-dırnağıyla qazanmalıdı ki, qalan futbolçular baş məşqçinin qərarından narazı qalmasın.
Həmçinin Emin yuxarıda xatırlatdığım hadisələrin təkrarlanmasına imkan verməməlidi. Performansı nəinki davamlı olmalı, oyundan-oyuna daha yaxşısını etməlidi. Bəlkə onda həm Qurban Qurbanovun millidəki rekordunu yeniləyər, həm də “Neftçi”ni əvvəlki əzəmətini bərpa etməsində ciddi rol oynayar. Bizə isə izləmək düşür ki, bu sualın cavabını öyrənək: Emin Mahmudov “come back” edə biləcəkmi?
KƏNAN BAHADIR
- Gecə Modu
- Ana səhifə
- Statistika
- Mənbələr
- Reytinq
- Hava
- Valyuta
