Braziliyanın “Fluminense” futbol klubu və müdafiəçi Marselo müqaviləni ləğv etmək barədə qarşılıqlı qərar qəbul ediblər.
Yeniavaz.com xəbər verir ki, bu barədə komandanın mətbuat xidməti məlumat yayıb.
Noyabrın 2-də “Fluminense” Braziliya çempionatında evdə “Qremio” ilə heç-heçə edib (2:2).
Belə ki, ikinci hissədə komandanın baş məşqçisi Mano Menezes Marselonu digər oyunçu ilə əvəz etmək üçün oyuna buraxmalı idi. Ancaq “As” qəzetinin yazdığına görə, meydana girməzdən əvvəl məşqçi ilə futbolçu arasında mübahisə baş verib. Daha sonra məşqçi qərarını ləğv edib və oyunçu ehtiyat oyunçular skamyasına qayıdıb.
Qeyd edək ki, Marselonun 36 yaşı var. O, “Fluminense”nin yetirməsidir və 2023-cü ilin fevralından komandaya qoşulub.
Braziliyalı karyerasının böyük bir hissəsində altı dəfə İspaniya çempionatının, iki dəfə İspaniya kubokunun, beş dəfə Çempionlar Liqasının və İspaniya Superkubokunun, dörd dəfə Klublararası Dünya Kubokunun, üç dəfə UEFA Super Kubokunun qalibi olduğu “Real Madrid”in rənglərini qoruyub. 2023-cü ildə müdafiəçi “Fluminense” ilə Libertadores Kubokunu qazanıb.
