Oktyabr ayında “Polymarket” kriptovalyuta proqnozu platformasında Donald Trampın ABŞ-dakı prezident seçkilərində qalib gəlmək şansı 67 faiz qiymətləndirilib.
Reyting.az “Forbes”ə istinadla bildirir ki, indi investorların Federal Ehtiyat Sistemi ilə bağlı panikaya düşməyə başladığı bir vaxtda Trampın qələbə şansı birdən-birə aşağı enib. Hazırda Tramp və onun demokrat rəqibi Kamala Harris arasında nisbət 50-nin 50-yədir.
Qeyd edək ki, proqnoz platformaları seçicilərin sorğusu deyil, istifadəçilərə seçkilərdən tutmuş pop mədəniyyət və idmana qədər müxtəlif hadisələrin gözlənilən nəticələrinə mərc etməyə imkan verən açıq bazardır.
Amerikalı istifadəçilər üçün əlçatan olmayan “Polymarket”də Trampın qalib gəlmə şansı həftə sonu təxminən 54 faizə düşüb, Harrisdə isə əmsallar 33 faizdən 45 faizə yüksəlib.
Bununla belə, Amerika istifadəçiləri üçün açıq olan rəqib proqnozlaşdırma platforması “Kalshi”də Tramp və Harris arasındakı fərq cəmi dörd faiz bəndinə qədər daralıb. “Kalshi” istifadəçiləri Trampın qalib gəlmə şansını 52 faiz, Harrisin şansını isə 48 faizhesab edib. Baxmayaraq ki, keçən həftənin əvvəlində Trampın xeyrinə 65 faiz olub.
Yanvar ayından bəri “Polymarket” ABŞ prezident seçkilərinin nəticələrinə 3 milyard dollardan çox mərc edib, Tramp istifadəçilər arasında ardıcıl olaraq favorit olub, onların əksəriyyəti kriptovalyutalarla maraqlanan gənclərdir.
Fransadan olan bir “Polymarket” istifadəçisi Trampın 2024-cü il ABŞ prezident seçkilərində qalib gəlməsinə 30 milyon dollar mərc edib. Qeyd olunur ki, o, səsverməyə təsir etmək istəmir, məqsədi sadəcə pul qazanmaqdır.
V. QULİYEV
