İtaliya Futbolunun Şöhrət Zalına tezliklə daha 3 nəfərin adı daxil ediləcək və bu şəxslər müasir günümüzün simalarıdır.
Arena.az bu barədə İtaliya Futbol Federasiyasının (FIGC) mətbuat xidmətinə istinadən məlumat verir.
İtalyan mütəxəssislər – Luçano Spalletti, Daniele De Rossi və ukraynalı keçmiş hücumçu Andrey Şevçenko noyabrın 11-də İtaliya Futbolunun Şöhrət Zalına daxil ediləcəklər.
İtaliya Futbolunun Şöhrət Zalı 2011-ci ildə təsis edilib. Zal, İtaliya futbolunun irsini, tarixini, mədəniyyətini və dəyərlərini qorumaq məqsədi daşıyır. Hər il Zala müxtəlif seçimlər üzrə yeni oyunçular, məşqçilər, hakimlər, məmurlar daxil edilir. İtalyan oyunçu, məşqçi, veteran, hakim, məmur, əcnəbi oyunçu seçimləri üzrə futbol dünyasından kəslər müəyyən edilir və həmçinin, Zala daxil edilmiş üzvlərə xatirə mükafatları da təqdim edilir.
İtaliya Futbolunun Şöhrət Zalının məşhur keçmiş futbolçuları arasında Andrea Pirlo, Paolo Maldini, Fabio Kannavaro, Françesko Totti, Dieqo Maradona və Ronaldo var.
