"Sabah" Misli Premyer Liqasının XIII turunda doğma meydanda "Kəpəz"lə 2:2 hesablı heç-heçə edib.
Sportnet.az xəbər verir ki, Masazır təmsilçisinin baş məşqçisi Krunoslav Renduliç matçdan sonra keçirilən mətbuat konfransında jurnalistlərin suallarını cavablandırıb:
- Hər birinizi bayram münasibətilə təbrik edirəm. Oyuna böyük səhvlə başladıq və qapımızda qol gördük. Belə olan halda oyuna davam etmək bir az çətindir. Amma qısa müddətdən sonra oyunu bərabərləşdirdik və rəqibdən daha yaxşı oynadıq. Bəxt sayəsində qol vurduq. Hücum və təzyiq etdiyimizə görə belə qol vura bildik. Bəzən belə olur. İkinci hissədə rəqibdən daha yaxşı idik. İki dənə yüz faizlik epizoddan istifadə edə bilmədik. Əfsuslar olsun ki, əvəzində rəqib fərqləndi.
- Qələbə qazansaydınız, oyun sizi qane edəcəkdi?
- Futbolçuların yanaşmasına, mübarizəsinə görə heç nə deyə bilmərəm. İki böyük səhvdən qapımızda qollar gördük.
- Son iki oyunda son dəqiqələrdə qol buraxırsınız. Komanda fiziki cəhətdən çatdırmır?
- "Zirə" ilə matçda da son dəqiqələrdə qol buraxmışdıq. Fiziki durumla bağlı bir şey deyil. Oyuna daha çox fokuslanmaq lazımdır.
- Son nöqtəni qoya bilməməyin səbəbi nədir?
- Rəqiblərə yuxarıdan aşağı baxdığımızı düşünmürəm. Bu, futboldur, belə şeylər olur. Bəzən boş qapıya qol vura bilmirik.
- Autsayderlə matçlarda itirilən xallar gələcəkdə "Sabah"a necə təsir edəcək?
- Rəqiblərin 3-4-cü dövrədə aqressiv mübarizə aparmaları normal olacaq. Son turlarda itirdiyimiz xalqlardan kino çəkmək olar. Hər oyunda yaxşı oynayan tərəf də bizik, xallar itirən də. Bunu şərh etmək çətindir. İtirilən hər xal problem yaradır.
