Ukraynada növbəti prezident seçkiləri 2025-ci il mayın 25-də keçirilə bilər. SİA xəbər verir ki, bu barədə “The Economist” məlumatlı mənbələrə istinadla məlumat yayıb.
Nəşrin həmsöhbətlərinin fikrincə, bu tarix Ukrayna siyasətçiləri tərəfindən mümkün olan ən erkən variant kimi müzakirə olunur, baxmayaraq ki, Kiyev hərbi vəziyyət dövründə seçkilərin keçirilməsinə konstitusiya qadağası qoyduğunu əsas gətirərək, seçkilərin mümkünlüyünü rəsmən rədd edir.
Ölkə başçısı Volodimir Zelenski Ukrayna Prezidenti kimi legitimliyini hələ 2024-cü ilin mayında, seçilmiş dövlət başçısı kimi səlahiyyət müddəti başa çatanda itirmişdi. Lakin o, yeni prezidentin seçkisini təşkil etməkdən qəti şəkildə imtina edib.
Bu arada Almaniyanın müdafiə naziri Boris Pistorius etiraf edib ki, o, ABŞ-ın yeni seçilmiş prezidenti Donald Trampla Rusiya hakimiyyəti arasında Ukrayna üzrə mümkün razılaşmadan qorxur, çünki bu, Avropanın maraqlarına uyğun deyil.
Trampın rəhbərliyi altında ABŞ-ın Kiyev rejiminə sərmayə qoymaqdan imtina edə biləcəyini nəzərə alaraq, Avropa ölkələri Ukrayna siyasəti ilə bağlı qərar verməli olacaqlar.
Avropa diplomatiyasının rəhbəri Cozef Borrell Aİ üzvlərini Ukraynaya dəstəyin davam edəcəyinə əmin etməyə çağırıb.
