Naxçıvan şəhəri, Əliabad Qəsəbəsinin sakini Nəsirov Vaqif İbrahim oğlu tərəfindən Hurriyyet.az saytının redaksiyasına şikayət məktubu daxil olub. Şikayətçi bildirir ki, onun oğlunu rüşvət almaq adı ilə ordudan tərxis ediblər:
“Mən, Nəsirov Vaqif İbrahim oğlu, yazaraq bildirirəm ki, övladım Nəsirov Tufan Vaqif oğlu 2007-ci ildə Naxçıvan Dövlət Universitetinin İqtisadiyyat və İdarəetmə fakultəsinə daxil olub. 2012-ci ildə universiteti bitirdikdən sonra hərbi xidmətə gedib. Hərbidən sonra Sərhəd Qoşunlarında işə qəbul olundu və birbaşa Lənkəran ərzaq anbarına göndərildi. Beləliklə, 5 il Sərhəd Qoşunlarında xidmət etdi. Rütbəsi baş gizir olub. Rütbə tələb edəndə 3 ay kursa göndəriblər.
Daha sonra Astara SNM məntəqəsinə təyin edildi. 6 il də Sərhəd SNM-də xidmət etdi. Rütbənin qiyməti 10 min manat olduğu üçün gücü çatmayıb almağa. Bu səbəbdən də Sədərək gömrük məntəqəsinə göndəriblər. Göndərilən uşaqlara qanunla 15 gün təlim keçməli idilər. 2 iş günü xidmət edib, sonra növbə rəisi, leytenant Elmar Əlizadə ilə sözü düz gəlməyib, aradalarında söz-söhbət yaranıb, bu səbəbdən də oğluma problem yaradılblar. Deyilənlərə görə, Elmar Əlizadə polkovnik Rəsul Əliyevin adamıdır.
Bildirim ki, TIR sürücüləri sərhəddən keçərkən oğluma 2 ədəd su, 2 ədəd də siqarət veriblər. Bu məsələni Əlizadə Elmar Rəsul Əliyevə deyib. Dərhal uşağı Bakı şəhərinə çağırıblar. Birbaşa kadrlar idarəsinin rəisinin otağına dəvət edərək, “niyə o suyu və siqareti almısan”, deyiblər. Özləri dünyanı yeyirlər, amma ört-basdır olunur. Bu vaxt oğlumdan gücümüz çatmayacaq qədər pul istəyiblər ki, ver, işinə davam et. Oğlum da deyib ki, mənim o qədər pulum yoxdur. Bu səbəbdən də onu tərxis ediblər.
Məsələni biləndən sonra dərhal cənab Prezidentə, Birinci vitse-prezidentə və Sərhəd Qoşunlarının rəisi Elçin Quliyevə məktub göndərdim. General-leytenant Elşən Verdiyevin müavinləri Cavid Məməmmdzadə və Azad Qasımov məktubuma cavab verdilər. Onlar mənə dedilər ki, heç yerə şikayət etmə, problem həll olunacaq.
Lakin heç bir reaksiya olmadığı üçün yenidən general-mayor Elçin Quliyevə məktub ünvanladım. Yenə cavabı Elşən Verdiyevin müavini verdi. Hara məktub yazıram, Elşən Verdiyev cavab verir. Sərhəd Qoşunlarında ondan başqa adam yoxdur?
Bildiyimə görə, hətta Prezident Aparatında da onlara yaxın adam var. Yəni Abbas Xəliovun kürəkənidir. Ona görə, şikayətimə baxılmır.
Oğlumun 37 yaşı və 2 övladı var. 41.6-cı maddə ilə tərxis ediblər. Məhkəmə də onların cavabına baxır. Avropa Məhkəməsinə üz tutmaq üçün də külli miqdarda pul lazımdır.
2 dəfə Elçin Quliyevin qəbuluna getmişəm, hər dəfə məsələni biləndə məni görüşə salmayıblar.
Polkovnik Rəsul Əliyev oğlumu tərxis edəndən sonra Əlizadə Elmarı Lənkəran Hava Limanına köçürüb.
Bildirim ki, özüm 1990-cı ildə Qarabağ müharibəsində döyüşmüşəm. Müstəqillik bayarağı Nazirlər Sovetinin pəncərəsindən özüm asmışam. Bu günə kimi veteranlığımı da ala bilməmişəm.
Oğlum Tufan Aprel döyüşlərinin iştirakçısı olub. Amma təəssüf ki, bəzi məmurlar vətəndaşı dövlətdən narazı salırlar”.
Jalə FAMİLQIZI
Redaksiyadan: Yazıda adları qeyd olunan şəxslərin mövqeyini dərc etməyə hazırıq.
