Məzmunca, "COP-29" BMT - nın tədbiri kimi planetimizin iqlim dəyişmələrinə həsr olunmuş beynəlxalq səviyyəli sammitdir. Mahiyyət baxımından isə bu tədbirin Bakıda keçirilməsi ölkəmiz üçün böyük şans yaradır. Sammitin başladığı gündən sonuna qədər ölkəmizə təxminən yüz min adamın gəlməsi gözlənilir.
Konfrans BMT - nın tədbiri olduğuna görə, nümayəndələrin hotel, nəqliyyat və qida xərclərini iştirakçı dövlətlərin özləri çəkəcək. Reallıqda tədbirdə iştirak edən insanlar şəxsi maraqları və əyləncələri üçün öz ciblərindən pul xərcləməlidir.
10 - 12 gün ərzində iştirakçı insanların hərəsi təqribən 1000 - 2000 dollar xərcləsə, bu 100 - 200 milyon dollar gəlir deməkdir. Bu gəlir Azərbaycan höküməti tərəfindən tədbirə xərclənən maliyyə vəsaitindən bir neçə dəfə çoxdur. Əlbətdə, özlüyündə bu gəlir o qədər də böyük deyil. Lakin əsas məsələ tamam başqadır.
Məlumdur ki, Birləşmiş Millətlər Təşkilatının (BMT) Baş katibi Antonio Quterreş BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyasında iştirak etmək məqsədilə noyabrın 11-də Azərbaycana səfərə gəlib. Baş katib konfransın gedişi zamanı ayrı-ayrı ölkələrin liderləri, həmçinin vətəndaş cəmiyyəti üzvləri ilə görüşəcək. Bu faktın özü Azərbaycana siyasi, iqtisadi və informasiya sahəsində çox yaxşı şans qazandıracaq. Çünki,
1. BMT - nin Baş katibinin Azərbaycana gəlməsi siyasi baxımdan çox ciddi tarixi hadisədir.
2. Bakıda keçirilən BMT-nin İqlim Dəyişikliyi üzrə 29-cu Konfransında Antonio Quterreşin şəxsən iştirak etməsi ölkəmizin Ermənistanla münasibətində Azərbaycanın haqlı tələblərinin yerinə yetirilməsi məsələsində informasiya sahəsində ölkəmiz üçün böyük fürsət yaradır.
3. COP-29 sammiti planetimizdə artan yüksək qlobal temperatur və ekstremal hava şəraitini tənzimləmək üçün hökumət, biznes və vətəndaş cəmiyyətinin liderlərini həll yollarını irəli sürmək üçün birləşdirəcək.
Əsas diqqət iqlimin normadan artıq istiləşməsinə səbəb olan problemlərin aradan qaldırılmasına yönəldilməsi nəzərdə tutulan maliyyələşməni təmin etməkdir.
Bu problemlərin həll olunması, artan emissiyaları azaltmaq və qorumaq üçün isə trilyonlarla dollar tələb olunur. Trilyon dollar isə çox böyük məbləğdir. Bu böyük məbləğdən hansı dövlətin payına nə qədər investisiya düşəcəyi isə çox ciddi məsələdir.
İnanırıq ki, təşkilatçı və iştirakçı ölkə kimi Azərbaycan bu zəngin investisiyadan əhəmiyyətli dərəcədə pay almağa nail olacaq. Bundan əlavə tədbirin keçirildiyi günlərdə Azərbaycanın adı dünya mətbuatında daha çox hallanacaq. Təqribən 100 min xarici ölkə vətəndaşı Bakının gözəlliyini və xalqımızın qonaqpərvərliyini görəcək.
Xoş təəssuratdan sonra bu insanlar ölkəmizin xeyrinə çalışan təbliğatçı ola bilər. Bu təbliğat perespektivdə Azərbaycana turist axınının çoxalmasına səbəb olacaq. Mahiyyət baxımından COP-29 Azərbaycana böyük dividentlər gətirəcək.
Qəvami Sadıqbəyli, Jurnalist - politoloq
