Noyabrın 11-i bazar ertəsindən etibarən Təbrizdə hava üç gün ərzində həssas qruplar üçün təhlükəli həddə çatan çirklənmə səviyyəsinə çatıb. Təbrizin bəzi bölgələrində hələ də, çirkli hava durumu davam edir.
İranın Hava Keyfiyyətini İzləmə Sisteminə görə, bazar ertəsi günü hava keyfiyyəti indeksi 133-ə çataraq həssas qruplar üçün sağlam olmayan vəziyyəti göstərib.
İRNA xəbər agentliyinin məlumatına əsasən, bazar ertəsi səhər saat 7-dən çərşənbə axşamı səhər saat 7-yə qədər 2.5 mikron ölçülü toz hissəciklərinin orta indeksi 117 olub ki, bu da həssas qruplar üçün təhlükəli hesab edilir.
Noyabrın 11-də, 2.5 mikron ölçülü toz hissəciklərinin ölçülməsi nəticəsində Təbrizin Bağşimal, Abresan, Mərmər Hotel və Namaz Meydanı daxil olmaqla müxtəlif stansiyalarında müvafiq olaraq 97, 132, 133 və 133 indeksləri qeydə alınıb ki, bu da həssas qruplar üçün sağlam olmayan vəziyyəti göstərir.
Bu gün, noyabrın 13-də bəzi yerlərdə, o cümlədən Namaz Meydanı və Abresan kimi məhəllələrdə hava keyfiyyəti indeksi müvafiq olaraq 57 və 55-ə enib ki, bu da havanın nisbi yaxşılaşmasını göstərir. Bununla belə, bu çirklənmə səviyyəsi hələ də tənəffüs və ürək xəstəlikləri olan şəxslər üçün təhlükəli ola bilər.
İranın media məlumatlarına görə, Təbriz payız fəslinin başlanğıcından, yəni 22 sentyabrdan bəri həssas qruplar üçün dörd dəfə təhlükəli hava çirklənməsi vəziyyətini yaşayıb ki, bu da təxminən üç ay müddətində yüksək rəqəm hesab olunur. SNA xəbər agentliyi bu çirklənmənin səbəbi kimi Təbriz istilik elektrik stansiyasını göstərib. Havanın soyuması və təbii qazın çatışmazlığı ilə əlaqədar bu elektrik stansiyası elektrik istehsalı üçün yüksək kükürd tərkibli mazutdan istifadə etməyə başlayıb. Hökumətin əmrinə əsasən ölkənin üç böyük şəhərində elektrik stansiyası mazutdan istifadəni dayandırsa da, bu elektrik stansiyası hələ də bu yanacaq növündən istifadə edir.
visiontv.az
