Estoniya millisinin baş məşqçisi Yurgen Henn bu gün Qəbələ şəhər stadionunda mətbuat konfransı keçirib.
QOL.az xəbər verir ki, mütəxəssis Millətlər Liqasının 5-ci turunda sabah Azərbaycan ilə Qəbələdə keçiriləcək oyun öncəsi jurnalistlərin suallarını cavablandırıb.
- Uzun səfərin oyuna mənfi təsiri ola bilər?
- Xeyr, hər şey yaxşıdır. Planları yaxşı həyata keçirmişik. Qonaqpərvərliyi xüsusi qeyd etmək istəyərdim. Çox yüksək səviyyədə təşkil olunub. Hər zaman olduğu kimi, Azərbaycanda hər şey yaxşıdır.
- İlk matçda Azərbaycana qalib gəldiniz. Sizin kimi gənc məşqçi Avropa çempionu olmuş Fernandu Santuşu məğlub etdi. Bu qələbədən sonra ölkənizdə sizə münasibət necə oldu?
- Bu haqda heç vaxt düşünməmişik. Önəmli olan komandanın göstəricisidir. Əlbəttə, Fernandu Santuşa qarşı oynamaq mənim üçün böyük qürur idi.
- Azərbaycanda belə təəssürat var ki, D Liqasına düşsək, faciə olacaq. Bəs Estoniyada fikirlər necədir?
- Məncə, hər yerdə belədir. Hər komanda istəyər ki, daha yüksək liqada çıxış etsin. Aşağı liqaya düşsək, bizdə də faciə sayılacaq. Amma onu da nəzərə alaq ki, digər qruplarla müqayisədə bizim qrup çətin idi. Həm biz, həm də Azərbaycan millisi başqa qrupda olsaydı, fərqli nəticə ola bilərdi. Əvvəl-axır kimsə D Liqasına düşməlidir.
- Az öncə qeyd edildiyi kimi Azərbaycan mətbuatında D Liqasına düşmək faciə hesab olunur. Bu amil sizə müsbət təsir ola bilər?
- Həm müsbət, həm də mənfi tərəfi ola bilər. Ümid edirik ki, mənfi təsiri olmaz və həyəcan bizə mane olmaz.
