Bu gün futbol üzrə UEFA Millətlər Liqasında 2024/2025-ci illər mövsümünün qrup mərhələsinin 5-ci turunun növbəti oyunları keçirilib.
Arena.az xəbər verir ki, turun ikinci oyun günündə A, C və D liqaları çərçivəsində daha 9 görüş baş tutub.
A Liqasının 4-cü qrupunda sonuncu Avropa çempionu İspaniya millisi Danimarkanın qonağı olub. Üç qolun qeydə alındığı oyun ispanların çətin qələbəsiylə yekunlaşıb. Qrupun digər oyununda İsveçrə və Serbiya yığmaları qarşılaşıblar və hərəyə 1 qol və 1 xalla kifayətləniblər.
A Liqasının 1-ci qrupunda isə Portuqaliya yığması Polşanı, Şotlandiya millisi Xorvatiyanı qəbul edib. Hər iki oyunda meydan sahibləri qələbəni bayram ediblər.
C Liqasının 2-ci qrupunda yer almış lider Rumıniya ilə əsas izləyicisi Kosovonun oyunu isə qalmaqallı alınıb. Rumın fanatların tribunalarda “Serbiya, Serbiya” şüarları səsləndirməsi qonaqların ürəyincə olmayıb. 90+3-cü dəqiqədə isə futbolçular arasında da gərginlik yaşanınca Kosovo yığması meydanı tərk edərək oyuna qayıtmaqdan imtina edib. Bu üzdən qarşılaşmanın yekun nəticəsi ilə bağlı UEFA-nın hansı qərarı qəbul edəcəyi maraqla gözlənilir.
Qeyd edək ki, UEFA Millətlər Liqasında qrup mərhələsinin 5-ci turunun qalan oyunları sabah – noyabrın 16-da keçiriləcək. Azərbaycan millisi də sabah Estoniya yığmasını qəbul edəcək.
UEFA Millətlər Liqası
Qrup mərhələsi, 5-ci tur
15 noyabr
A Liqası, 1-ci qrup
Şotlandiya – Xorvatiya 1:0
Qol: Makqinn, 86.
Portuqaliya – Polşa 5:1
Qollar: Leao, 59. Ronaldo, 72-pen; 87. B.Fernandes, 80. Neto, 83 – Marçuk, 88.
Xallar: Portuqaliya – 13. Xorvatiya – 7. Polşa – 4. Şotlandiya – 4.
A Liqası, 4-cü qrup
Danimarka – İspaniya 1:2
Qollar: İsaksen, 84 – Oyarsabal, 15. A.Peres, 58.
İsveçrə – Serbiya 1:1
Qollar: Amduni, 78 – Terziç, 88.
Xallar: İspaniya – 13. Danimarka – 7. Serbiya – 5. İsveçrə – 2.
C Liqası, 2-ci qrup
Kipr – Litva 2:1
Qollar: Kastanos, 18. Tsionis, 63 – Gineitis, 47.
Rumıniya – Kosovo 0:0
Xallar: Rumıniya – 12. Kosovo – 9. Kipr – 6. Litva – 0.
C Liqası, 3-cü qrup
Şimali İrlandiya – Belarus 2:0
Qollar: Ballard, 50. Çarles, 63-pen.
Lüksemburq – Bolqarıstan 0:1
Qol: Krayev, 23.
Xallar: Şimali İrlandiya – 10. Bolqarıstan – 8. Belarus – 6. Lüksemburq – 2.
D Liqası, 1-ci qrup
San Marino – Cəbəllütariq 1:1
Qollar: Nanni, 90+1-pen – L.Uolker, 11-pen.
Xallar: Cəbəllütariq – 6. San Marino – 4. Lixtenşteyn – 2.
