Beynəlxalq kredit reytinqi agentliyi "Capital Intelligence Ratings" (CI), Türkiyənin kredit reytinqini yüksəldib.
"CI"-nin açıqlamasına əsasən, Türkiyənin uzunmüddətli xarici və yerli valyuta üzrə kredit reytinqləri "B" səviyyəsindən "BB-" səviyyəsinə qaldırılıb.
Valyuta.Az xəbər verir ki, qurum, qısamüddətli reytinqlərdə dəyişiklik etməyib və onları "B" səviyyəsində saxlayıb.
Açıqlamada bildirilir ki, reytinqin artırılması, daha ardıcıl və ehtiyatlı pul və maliyyə siyasətlərinin tətbiqi, nəticədə makroiqtisadi disbalansların azalması və beynəlxalq likvidliyin yaxşılaşması ilə bağlıdır.
"CI", daha sərt ümumi siyasət yanaşmasının inflyasiyanın azalmasına və Türk lirəsinə olan etimadın artmasına kömək etdiyini vurğulayıb. Bu, dollarlaşmanın azalmasına və valyuta ilə qorunan əmanət planlarının sürətlə geri çəkilməsinə səbəb olub. Bundan əlavə, xalis və ümumi valyuta ehtiyatlarının cari hesab kəsirinin azalması və daha yüksək kapital axınları ilə dəstəklənərək artdığı qeyd edilib.
Qurum, xalis ixrac və investisiyalarda gözlənilən yaxşılaşma sayəsində ÜDM-in 2024-2026-cı illərdə orta hesabla 3% olacağını proqnozlaşdırır. Bununla yanaşı, iqtisadi artım perspektivləri ilə bağlı risklərin davam etdiyi xəbərdarlığı da verilib.
"CI", Türkiyənin reytinqi ilə bağlı "yüksəliş və eniş" ssenariləri təqdim edib.
- Yüksəliş ssenarisi: Maliyyə və pul siyasəti arasında koordinasiya yaxşılaşarsa, inflyasiya gözləniləndən daha sürətli azalarsa və makroiqtisadi sabitlik davam edərsə, reytinq perspektivi yaxın 12 ay ərzində "pozitiv" olaraq qiymətləndirilə bilər. Ehtiyat tamponlarının əhəmiyyətli dərəcədə artması və qısamüddətli xarici borcların adekvat şəkildə ödənməsi də reytinqin daha da artırılmasına səbəb ola bilər.
- Eniş ssenarisi: Əgər "investor etimadı" zəifləyərsə, hökumət qeyri-adi iqtisadi və pul siyasətlərinə dönərsə və ya ölkənin qısamüddətli xarici likvidlik mövqeyi zəifləyərsə, reytinq perspektivi "neqativ" olaraq qiymətləndirilə bilər. Bundan başqa, dövlət borcunun kəskin artması və valyuta məzənnəsində ciddi pisləşmə də reytinqlərin yenidən nəzərdən keçirilməsinə gətirib çıxara bilər.
Reytinqin artırılmasından sonra reytinq perspektivi "pozitiv"dən "sabit"ə dəyişdirilib.
Aydın
