ABŞ prezidenti Co Bayden Çin lideri Si Cinpinlə görüşə hazırlaşır.
Reyting.az “Bloomberg”ə istinadla xəbər verir ki, o, vəzifədə qalan həftələrindən xarici siyasət irsini möhkəmləndirmək üçün istifadə etməyə çalışacaq.
Agentlik yazır ki, ABŞ-nın xarici siyasəti artıq Baydensiz də irəli gedə bilər, çünki bütün diqqət gələcək prezident - Donald Trampa yönəlib. Buna baxmayaraq, Ağ evin hazırkı rəhbəri xarici siyasətdə uğurlarını möhkəmləndirməyə, o cümlədən Ukraynanın Rusiya təcavüzündən müdafiəsinə kömək etməyə cəhd edə bilər.
Jurnalistlərin fikrincə, Trampın Ukraynaya yardımı ləğv edəcəyi ilə bağlı şayiələr Bayden və onun administrasiyasını vəzifədə qalan müddətdə daha fəal hərəkətə məcbur edir. Məsələn, ABŞ-nın milli təhlükəsizlik müşaviri Ceyk Sallivanın paylaşdığı kimi, Si Cinpinlə görüşdə tərəflər dünya nizamının sabitliyi və Ukraynadakı müharibəni müzakirə etməyə hazırlaşır.
“Bloomberg” yazır ki, Tramp Yaxın Şərqdəki müharibəyə təsir edə biləcəyini deyib. Qeyd edilir ki, İsrailin baş naziri Benyamin Netanyahu Baydenin Livan və Qəzza zolağında dinc əhali arasında itkiləri məhdudlaşdırmaq çağırışlarına məhəl qoymasa da, respublikaçının Ağ evə gəlməsi ilə vəziyyət dəyişə bilər.
Xatırladaq ki, Tramp ilk səlahiyyət müddətində ABŞ səfirliyini Qüdsə köçürərək İsrail hökumətinə güclü mesaj göndərib.
Agentlik qeyd edib ki, İranın nüvə proqramına eyni zamanda zərbə endirməklə yanaşı, anı dəyərləndirmək və işğal olunmuş İordan çayının qərb sahilində suverenlik yaratmaq lazımdır.
Bəzi İsrail KİV-lərinin məlumatına görə, Tramp Yaxın Şərqdə müharibəni tamamilə dayandırmaq niyyətindədir. Vurğulanır ki, o, İsrail və Səudiyyə Ərəbistanı arasında potensial olaraq böyük razılaşmaya yol açan atəşkəs planını Netanyahu ilə müzakirə etmək istəyir.
Peruda keçirilən Asiya-Sakit Okean İqtisadi Əməkdaşlıq Forumunda Baydenin olmasına baxmayaraq, liderlər dünya nizamının gözlənilən yenidən qurulması və Trampın prezidentliyinin gələcəyi haqqında danışıblar.
Bundan əvvəl Pentaqon ABŞ prezidenti Co Bayden administrasiyasının sonuna qədər Ukraynaya 7,1 milyard dollar yardım göstərməyi planlaşdırdığını bildirib. Pentaqon rəsmisi Sabrina Sinq xatırladıb ki, hazırkı prezident səlahiyyət müddəti başa çatana qədər Konqresin təsdiq etdiyi bütün yardımları çatdırmaq istəyir.
Bundan əlavə, jurnalistlər bildiriblər ki, Baydenin prezidentlik müddəti başa çatana qədər Ukraynaya necə kömək etmək barədə seçimləri azdır. O, bütün vədlərini yerinə yetirməyə bilər.
ELÇİN
