AZ

Emiliano Martines: “Fransızların Messini fitə basmaları təbiidir”

“Aston Villa” və Argentina yığmasının qapıçısı Emiliano Martines “albiseleste”nin ulduz hücumçusu və kapitanı Lionel Messidən söhbət açıb.

Arena.az “France Football” dərgisinə istinadən məlumat verir ki, Martines, Messinin 2023-cü ildə “Qızıl top” mükafatını qazandığı elan edilərkən, argentinalı udluzun ünvanına fit sədalarının ucalmasına münasibətini açıqlayıb:

“Mənim atam keçənilki “Qızıl top”un təqdimat mərasimində Messinin ünvana yönəlmiş fitəbasmadan azacıq sarsılmışdı. Həmin axşam zalda bir neçə azarkeş vardı. Bununla belə, bu, adi təzahürdür. Kilian Mbappe də Argentinada belə bir mükafatı alsa, heç kim onu təbrik etməyə qalxmayacaq”, deyə Emiliano Martines vurğulayıb.

Xatırladaq ki, “Qızıl top” mükafatlarının təqdimetmə mərasimi Parisdə keçirilir. Fransız azarkeşlərin Messiyə müvafiq münasibətinin qaynaqlandığı əsas məqam, 2022-ci ildə Qətərdə keçirilmiş dünya çempionatının final oyununun nəticəsinə dayanır. O vaxt “Leo”nun Argentinası Kilian Mbappenin Fransasını məğlub etmişdi (əsas və əlavə vaxt 3:3, penaltilərlə 4:2).

Lionel Messi 2023-cü ilin yayından MLS təmsilçisi “İnter Mayami”də çıxış edir. Argentinalı ulduz amerikan klubuna PSJ-dən azad agent qismində qoşulub. “Leo”nun “İnter Mayami” ilə müddəti 2025-ci ilin dekabr ayının sonuna qədər qüvvədə olacaq müqaviləsi var.

Argentinalı ulduz cari mövsümdə “İnter Mayami”nin heyətində bütün yarışlarda 25 oyuna çıxıb, 23 qol vurub və 13 məhsuldar ötürmə verib. Təcrübəli ulduzun “İnter Mayami” karyerası ümumilikdə 39 oyun, 34 qol və 18 məhsuldar ötürmədən ibarətdir.

“Leo” hazırda kapitanı olduğu Argentina yığmasında 2005-ci il avqustun 17-də debüt edib. Ulduz hücumçu yığmada 190 oyun keçirib, 112 qol vurub və 60 məhsuldar ötürmə verib. Bu göstəricilər üzrə “Leo” yığmanın mütləq rekordçusudur.

Argentinalı superulduz Argentina yığması ilə Yay Olimpiya Oyunlarının (2008), Amerika Kubokunun (2021, 2024), FIFA Dünya Kubokunun (2022), Çempionların CONMEBOL-UEFA Kubokunun (2022) qalibi olub. Həmçinin Messi dünya çempionatının (2014) və Amerika Kubokunun gümüş (2007, 2015, 2016) mükafatçısı olub.

“Leo”nun qənimətlər muzeyində müxtəlif fərdi mükafatlar, həmçinin 8 “Qızıl top”u var.

Seçilən
39
arena.az

1Mənbələr