Azərbaycan Silahlı Qüvvələrinin əsgəri olan Elşən Salayev 2020-ci ilin 27 sentyabrında başlanan Vətən müharibəsi zamanı Tərtərin Talış kəndi istiqamətində gedən döyüşlərə qatılıb və bu istiqamətdəki döyüşlər zamanı qəhrəmancasına şəhid olub. Şəhidimiz 18 noyabr tarixində Bakı şəhərində dəfn olunub.
QHT.az xəbər verir ki, o, 8 iyun 1998-ci ildə Bakı şəhərində anadan olub. 2015-ci ildə 264 nömrəli məktəb-liseydən məzun olaraq 617 balla Bakı Dövlət Universitetinin Tarix fakültəsinə qəbul olub. 2019-cu ildə universitetdən məzun olaraq hərbi xidmətə yollanıb.
Elşən Salayev göstərdiyi qəhrəmanlığa görə Azərbaycan Respublikasının Prezidenti İlham Əliyevin Sərəncamına əsasən ölümündən sonra "Vətən uğrunda", "Cəsur döyüşçü" və "Suqovuşanın azad olunmasına görə" medalları ilə təltif edilib.
Ruhu şad olsun!
