“Latsio”nun ispan veteran sağ cinah hücumçusu Pedro Rodriges verdiyi müsahibə ilə İtaliyanın paytaxtı Romada qalmaqal yaradıb.
Arena.az jurnalist Nikolo Skiraya istinadən məlumat verir ki, Pedro müsahibəsində, daha əvvəl çıxış etdiyi “Roma”nın onu “canavarlar”ın əsas rəqibi “Latsio”ya satmasına kinayə ilə eyham vurub və “Latsio”nu Romanın əsas komandası adlandırıb:
“Roma”ya, məni Romadakı əsas komandaya, yəni məhz “Latsio”ya satdığı üçün minnətdaram. Derbidə daha bir qol vurmağa ümidvaram, təqaüdə çıxana qədər “Latsio” ilə kubok qazanmağı xəyal edirəm. Avropa Liqasını qazana bilərik. Bu baş versə, mən Trevi fəvvarəsinə dalacağam”, deyə Pedro vurğulayıb.
Pedronun müsahibəsi “Latsio”nun əzəli rəqibi “canavarlar”ın azarkeşləri arasında qıcıq yaradıb. “Roma” tərəfdarı “qartallar”ın hücumçusunu xain adlandırıb və bəzi çılğın azarkeşlər sosial şəbəkələrdə Pedronu əxlaqsız sözlərə “qonaq” ediblər.
Pedro futbola “San-İsidoro” klubunda qədəm qoyub və böyük futbolda debüt edib. Buradan “Barsleona”ya yol tapmış ispan futbolçu, ardınca “Çelsi” və “Roma”da çıxış edib.
Pedro “Roma”nın düşərgəsindən “Latsio”ya 2021-ci ilin avqustunda azad agent qismində qoşulub. O vaxt “canavarlar” ispan hücumçunun xidmətinə ehtiyac görməyiblər.
Cari mövsümdə Pedro “Latsio”nun heyətində 12 oyuna çıxıb, 6 qol və 2 məhsuldar ötürmə ilə fərqlənib.
Pedronun “qartallar”ın heyətində çıxışının ümumi mənzərəsi 144 oyun, 26 qol və 14 məhsuldar ötürmədən ibarətdir.
Pedro 2010-cu ilin may ayında debüt etdiyi İspaniya yığmasının heyətində 65 oyun keçirib, 17 qol vurub və 11 məhsudlar ötürmə verib.
Pedronun qənimətlər muzeyində “Barselona” ilə 5 İspaniya çempionluğu, 3 İspaniya Kuboku, 5 İspaniya Super Kuboku, 3 Çempionlar Liqası, 3 UEFA Super Kuboku, 2 FIFA Klub Dünya Kuboku, həmçinin “Çelsi” ilə İngiltərə çempionluğu, İngiltərə Kuboku və Avropa Liqası var.
İspaniya yığması ilə Pedro 2010-cu il dünya çempionatının və 2012-ci il Avropa çempionatının qalibi olub.
“Transfermarkt” internet-portalı 37 yaşlı ispan veteran sağ cinah hücumçusu Pedro Rodrigesin transfer dəyərini 1 milyon avro məbləğində qiymətləndirir.
