Rusiyanın BMT-dəki daimi nümayəndəsi Vasiliy Nebenzya bildirib ki, Ukrayna İngiltərənin müdaxilələri səbəbindən sülh sazişindən imtina edib və bu, ölkəni dərin böhrana sürükləyib.
Musavat.com xəbər verir ki, Nebenzya BMT Təhlükəsizlik Şurasında (BMTTŞ) çıxışı zamanı İngiltərənin o vaxtkı baş naziri Boris Consonun Kiyevə gələrək İstanbulda hazırlanan sülh sazişini pozmağa çalışdığını vurğulayıb.
“Sazişə çox yaxın idilər”
Nebenzya qeyd edib ki, Rusiya və Ukrayna İstanbulda sülh sazişinə çox yaxın idilər, lakin İngiltərə Kiyev rəhbərliyini fərqli bir istiqamətə yönəltdi. O, çıxışında belə deyib:
“İngiltərə Kiyev rejimini Rusiya ilə münaqişəni davam etdirməyə təhrik edərək Ukraynanı qaçılmaz məğlubiyyətə sürüklədi. Nəticədə Ukrayna ordusunun böyük bir hissəsini və dörd bölgəsini itirdi. Bundan əlavə, ölkə ağır iqtisadi vəziyyətə düşdü.”
“Londanın rəngli inqilab siyasəti”
Nebenzya həmçinin qeyd edib ki, İngiltərə “itirilmiş dünya hökmranlığına olan nostalji ilə” hərəkət edir. O vurğulayıb ki, London şantaj və sanksiyalardan istifadə edərək istəmədiyi hökumətləri devirmək üçün “rəngli inqilablar” siyasətini yürüdüb və Ukrayna da bu siyasətin qurbanlarından biri olub.
Rusiyalı nümayəndə əlavə edib ki, İngiltərənin Kiyevə təsiri sülhün deyil, münaqişənin davam etdirilməsinə səbəb olub və bu, Ukraynaya böyük ziyan vurub.
Musavat.com
