BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyası (COP29) çərçivəsində “İqlim dəyişmələri mövzusunda maarifləndirmə: Gənclərin və pedaqoqların kritik rolu” adlı tədbir keçirilib.
APA-nın xəbərinə görə, tədbirdə COP29-un Gənc İqlim Çempionu Leyla Həsənova, BMT-nin İqlim Dəyişmələri üzrə Çərçivə Konvensiyasının (UNFCCC) uyğunlaşma direktoru Yussef Nassef və digər şəxslər iştirak ediblər.
Tədbiri giriş sözü ilə açan Leyla Həsənova iqlim dəyişikliyi təhsilinin transformativ olmalı olduğunu vurğulayıb: “Bütün yaş qruplarındakı gənclər iqlim böhranının təsirlərinin başa düşməli və onlara qarşı mübarizə aparmaq üçün lazımi bilik və bacarıqlarla təmin edilməlidir. Bu məsələ hər kəs üçün faydalı olsa da, uşaqlar və gənclər üçün xüsusilə çox vacibdir”.
O qeyd edib ki, bu prosesin əsasında müəllimlər dayanır: "Biz onlara iqlim dəyişikliyi ilə bağlı təhsili effektiv və ruhlandırıcı şəkildə çatdırmaq üçün lazımi bilik, alətlər və resurslarla təchiz etməliyik”.
L. Həsənova bugünkü müzakirənin iqlim dəyişikliyi ilə bağlı təhsilin inkişaf etdirilməsi və bu qlobal təşəbbüsdə gənclərin və pedaqoqların mühüm roll oynadığını vurğulayıb.
UNFCCC uyğunlaşma direktoru Yussef Nassef təhsilin bu kimi transformasiyalar üçün sıçrayış nöqtəsini təmin edəcəyini bildirib: “Hazırda bir çox insan təhsilin "yaşıllaşdırılması" məsələsini müzakirə edir və bunu yalnız iqlim dəyişikliyinin təsirləri və həll yolları haqqında məlumatla məhdudlaşdırır. Amma mən bunun daha irəli getməsini istəyirəm. Belə ki, lazım olan dəyişiklik təhsil sistemlərimizə, düşüncə tərzimizin dəyişdirilməsinə, təbiətə və rifaha baxışımıza inteqrasiya edilməlidir. Bu dəyişikliklərin çoxu məhz erkən təhsil illərindən başlayır. Əgər bunu etsək, gənclərin liderlər və dayanıqlı gələcək üçün katalizatorlar kimi potensialını ortaya çıxara bilərik. Mən bu günkü müzakirələri səbirsizliklə gözləyirəm və gəncləri və müəllimləri bu vacib missiyada gücləndirmək səylərimizi birlikdə daha da gücləndirməyin yollarını araşdırmağı səbirsizliklə istəyirəm”.
Tədbir fikir mübadiləsi ilə davam edib.
