Çərşənbə axşamı günü ABŞ-da statistik məlumatların proqnozların altında dərc olunması fonunda dollar major valyutalar qarşısında bir qədər ucuzlaşdı. EUR/USD valyuta cütlüyü ötən gün ərzində 1.0523 səviyyəsindən 1.0609 səviyyəsinə qədər bahalaşıb. GBP/USD cütlüyü isə eyni dövr ərzində 1.2612 həddindən 1.2695 həddinə qədər artım göstərib.
Bugün səhər saatlarında Yaponiyada açıqlanan göstəricilər fonunda USDJPY valyuta cütlüyü isə dünən 153.270 həddindən başlayan artım tendensiyasını davam etdirib. Belə ki, məzənnə hal-hazırda 155.050 səviyyəsində qərarlaşıb. Verilən məlumatlara əsasən, oktyabr ayında Yaponiyanın Ticarət Saldosunun kəsiri 294.1 milyard yendən 461.2 milyard yenə qədər artıb, İxrac həcmi isə 3.1% artıb.
Qızılın beynəlxalq birjalarda qiyməti artmaqda davam edir. Belə ki, dəyərli metal artıq 2635$ səviyyəsinin üzərindədir. “Brent” markalı neftin qiyməti isə Amerikanın Neft İnstitutunun Neft Ehtiyatlarına dair açıqladığı proqnoz fonunda 73.4$-a qədər uuzlaşıb.
Dünən Avropa İttifaqının Statistika İdarəsinin təqdim etdiyi yekun məlumatlara əsasən, Avrozonada sentyabr ayı ilə müqayisədə oktyabr ayında istehlak qiymətləri illik ifadədə 2.0%, aylıq ifadədə isə 0.3% artıb. Dərc olunmuş hər iki göstərici analitiklərin proqnozları ilə üst-üstə düşdü. ABŞ-da isə Tikinti Üzrə İcazələrin Sayı 1.416 milyona qədər azalıb, Tikintisinə Başlanılan Evlərin sayı isə 3.1% azalaraq 1.311 milyona çatıb.
Bugün Bakı vaxtı ilə saat 11:00-da Böyük Britaniyada açıqlanacaq inflyasiyaya dair göstəricilər investorların diqqət mərkəzində olacaq əsas xəbərlərdir. Həmçinin, Almaniyada dərc olunacaq İstehsal Qiymətləri İndeksi (PPI) bazar iştirakçıları tərəfindən maraqla gözlənilir.
Məlumat İnvest-AZ İnvestisiya Şirkətinin analitikləri tərəfindən hazırlanıb.
