1 iyul 2024-cü ildən etibarən Oxu.az mobil tətbiqinin köhnə versiyasına dəstək dayandırılacaq - yenilənmiş versiyanı endirmək üçün Google Play və ya AppStore-a keçməyiniz xahiş olunur.
COP29-un Yaşıl Zonasında "Gələcəyə qulaq as" adlı sərgi təşkil edilib Bakıda BMT-nin İqlim Dəyişikliyi üzrə çərçivə Konvensiyasının Tərəfləri Konfransının 29-cu sessiyasının (COP29) onuncu günündə Yaşıl Zonada Azərbaycan Respublikası Gənclər və İdman Nazirliyi "UNICEF Azərbaycan"la birgə Dünya Uşaqlar Günü ilə əlaqədar "Gələcəyə qulaq as" adlı sərgi təşkil edib.
Oxu.Az xəbər verir ki, Gənclər Evi pavilyonunda baş tutan sərgidə 20-dən çox ölkədən uşaqların iqlim fəaliyyətinə dair fikir və ideyaları süni intellekt vasitəsilə nümayiş etdirilib.
UNICEF-in Avropa və Mərkəzi Asiya üzrə Regional Ofisi tərəfindən hazırlanan sərginin açılış mərasimində gənclər və idman naziri Fərid Qayıbov, UNICEF-in Azərbaycandakı nümayəndəsi Saca Faruq Abdullah və gənc iqlim elçiləri iştirak ediblər.
"COP29 çərçivəsində fəaliyyət göstərən Gənclər Evi Yaşıl zonada gənclərin və uşaqların əsl evinə çevrilib. Hər kəsin böyük maraqla ziyarət etdiyi pavilyonda yaşıl dünya naminə həmrəylik davam edir. Sərgidə uşaqların iqlim dəyişmələri ilə bağlı ifadə etdikləri düşüncə və arzuları hər kəsin diqqətini cəlb etməlidir", - deyə Gənclər və İdman naziri cənab Fərid Qayıbov bildirib.
"COP29-da gənclərin bilikləri və göstərdikləri həvəs məni heyran edir. Onların dünyanı daha yaxşı bir yerə çevirmək, iqlim dəyişikliyinin təsirlərini azaltmaq üçün irəli sürdükləri ideyalar və həll yolları nəzərə alınmalıdır", - deyə UNICEF-in Azərbaycandakı nümayəndəsi Saca Faruq Abdullah vurğulayıb.
Qeyd edək ki, sərgi gün ərzində Yaşıl Zonadakı Gənclər Evi pavilyonunda nümayiş olunacaq.
Xanım Aydın
