Qadın futbolçulardan ibarət Azərbaycan millisi 2024-cü ilin sonunda Rusiya yığması ilə iki yoxlama oyunu keçirəcək.
Arena.az xəbər verir ki, bu barədə Rusiya Futbol İttifaqının (RFS) mətbuat xidməti məlumat yayıb.
Xəbərdə bildirilir ki, Rusiyanın qadınlardan ibarət yığması noyabrın 24-dən dekabrın 3-nə qədər Soçidə təlim-məşq toplanışı keçəcək. Azərbaycanla oyunlar da məhz bu toplanış zamanı baş tutacaq.
Görüşlər noyabrın 28-də “Fişt” stadionunda və dekabrın 2-də “Soçi” klubunun məşq bazasında qapalı rejimdə keçiriləcək. Oyunlara Bakı vaxtı ilə saat 18:00-da start veriləcək.
Xatərladaq ki, Rusiya və Azərbaycanın qadınlardan ibarət milli komandaları daha əvvəl iki dəfə münasibətləri aydınlaşdırıblar. 2021-ci ilin sentyabrında Azərbaycan millisi dünya çempionatının seçmə mərhələsində Moskvada rəqibinə 0:2 hesabı ilə məğlub olub. Həmin ilin noyabrında Bakıda baş tutan qarşılaşma da Rusiya yığmasının qələbəsi ilə yekunlaşıb – 4:0.
