Məşqçini göstər, deyim necə komandasan. 79 yaşlı Mirça Luçescu avqustda Rumıniya millisinin baş məşqçisi təyin olunub, payızda komanda C liqasının 2-ci qrupunda keçirdiyi altı matçın hamısında qalib gəlib.
İdman.biz xəbər verir ki, rumınlardan başqa hazırkı UEFA Millətlər Liqasında 100 faizli nəticə göstərən olmayıb.
B liqasında Çexiya, Ukrayna, Gürcüstan və Albaniyanın yer aldığı 1-ci qrupda gərgin mübarizə gedib. Liderlə autsayder arasında cəmi 4 xal fərqi olub. Çexiya yalnız son turdakı qələbə sayəsində ilk yeri tutub, Albaniya isə mənfi top fərqinə görə Gürcüstandan geri qalaraq sonuncu olub və C liqasına düşüb.
Bəs UEFA Millətlər Liqasında hansı sensasiya və məyusluqlar yaşanıb?
A liqasında, demək olar ki, gözlənilməz nəticələr qeydə alınmayıb. Yalnız Belçikanın (6 oyundan 4 xal), həmçinin cəmi 2 xalla liqanı tərk edən İsveçrənin zəif çıxışı diqqəti çəkir.
B liqasında yarışdan əvvəl reytinqinə görə 2-ci qrupda sonuncu mövqedə olan Yunanıstanın liderlik uğrunda İngiltərə ilə mübarizəsini (hərəyə 15 xal), Finlandiyanın isə, əksinə, bir xal belə toplaya bilməməsini qeyd etmək mümkündür.
Burada 4-cü qrupda da oxşar hal yaşanıb. Yarışdan əvvəl reytinqinə görə qrupda sonuncu mövqedə olan Türkiyə son turda gözlənilmədən autsayder Monteneqroya uduzaraq (1:3) liderliyi əldən verib və indi tarixində ilk dəfə A liqasına çıxmaq üçün pley-offda mübarizə aparmalı olacaq.
C liqasında da Azərbaycan millisi yarışdan əvvəl reytinqinə görə 1-ci qrupda ikinci sayılsa da, cəmi 1 xal toplayaraq sonuncu yeri tutub və ən aşağı – D liqasına düşüb.
Son illər inamlı çıxışı ilə diqqət çəkən Lüksemburqun burada qrupda sonuncu yeri tutması, Şimali Makedoniyanın isə uğurlu çıxışı (6 oyunda 15 xal) diqqəti çəkir.
Ən böyük sensasiyaya isə San Marino imza atıb. Son 20 ildə ilk dəfə qələbə qazanan cırtdan ölkə millisi sonra daha bir oyunda rəqibini məğlub edib, nəticədə qrup qalibi kimi birbaşa C liqasına yüksəlib.
UEFA Millətlər Liqasında A liqasının çempionluq yarışı, həmçinin digər liqalarda pley-off oyunlarının püşkü sabah atılacaq. Turnir 2025-ci ilin martından davam edəcək.
2026/27 UEFA Millətlər Liqasında kim harada çıxış edəcək?
A liqası: Almaniya, Çexiya, Danimarka, Fransa, Xorvatiya, İngiltərə, İspaniya, İtaliya, Niderland, Norveç, Portuqaliya, Uels.
A və ya B liqası: Avstriya, Belçika, Macarıstan, Serbiya, Şotlandiya, Türkiyə, Ukrayna, Yunanıstan.
B liqası: Bosniya və Herseqovina, İsrail, İsveç, İsveçrə, Polşa, Rumıniya, Şimali İrlandiya, Şimali Makedoniya.
B və ya C liqası: Bolqarıstan, Ermənistan, Gürcüstan, İrlandiya, İslandiya, Kosovo, Slovakiya, Sloveniya.
C liqası: Albaniya, Belarus, Kipr, Estoniya, Farer adaları, Finlandiya, Qazaxıstan, Moldova, Monteneqro, San Marino.
C və ya D liqası: Cəbəllütariq, Latviya, Lüksemburq, Malta.
D liqası: Andorra, AZƏRBAYCAN, Lixtenşteyn, Litva.
İdman.biz
