"WhatsApp" səsli mesajları mətnə çevirmək üçün yeni bir funksiyanı - "səsli mesaj transkriptləri" xüsusiyyətini təqdim edib.
Valyuta.Az şirkətə istinadən xəbər verir ki, bu yenilik yaxın günlərdə bütün iOS və Android istifadəçiləri üçün əlçatan olacaq.
Bu xüsusiyyət sayəsində platformadakı səsli mesajlar avtomatik olaraq mətn formasında təqdim ediləcək. Mətnlər səsli mesajların altında görünəcək, beləliklə, mesajları dinləmək mümkün olmadıqda onları oxumaq imkanı yaranacaq.
Səsli mesaj göndərmək çox vaxt uzun bir mətni yazmaqdan daha rahat olsa da, mesajı alanlar hər zaman səsli mesajları dinləmək imkanı tapa bilməyə bilərlər. "Səsli mesaj transkriptləri" funksiyası məhz bu səbəbdən həm göndərənlərin, həm də alanların rahatlığını təmin etmək üçün hazırlanıb.
Bu xüsusiyyət cihaz daxilində işləyəcək, yəni "WhatsApp" da daxil olmaqla heç kim səsli mesajları dinləyə bilməyəcək. Funksiya standart olaraq deaktiv vəziyyətdə olacaq və istifadəçilər istəsələr, onu aktivləşdirə bilərlər. Bunun üçün "WhatsApp" parametrlərindən "söhbətlər" bölməsinə daxil olub funksiyanı aktivləşdirmək kifayətdir. Daha sonra bir mesajın üzərinə uzun basaraq "mətnə çevir" seçimini etmək mümkün olacaq.
Dil dəstəyi isə əməliyyat sistemindən asılı olaraq dəyişir. Android istifadəçiləri üçün ilkin mərhələdə ingilis, portuqal, ispan, rus və hind dilləri dəstəklənəcək.
iOS istifadəçiləri isə daha geniş dil dəstəyi ilə təmin ediləcəklər. Əgər iOS 16 və ya daha yeni bir sistemdən istifadə edirsinizsə, funksiyanın dəstəklədiyi dillər arasında ingilis, ispan, fransız, alman, italyan, yapon, koreya, portuqal, rus, türk, çin və ərəb dilləri olacaq. Əgər iOS 17 və üzərində bir əməliyyat sisteminiz varsa, siyahıya danimarka, fin, malay, norveç, holland, isveç, ivrit və tay dilləri də əlavə olunacaq.
Bununla yanaşı, "WhatsApp" dil dəstəyinin gələcək aylarda daha da genişləndiriləcəyini bildirib. "Səsli mesaj transkriptləri" funksiyası artıq istifadəçilərə tanış ola bilər, çünki keçən il "Apple" buna bənzər bir funksiyanı təqdim etmişdi. Belə görünür ki, bu cür funksiyalar getdikcə populyarlaşır və yaxın gələcəkdə müxtəlif mesajlaşma tətbiqlərində də tez-tez görünəcək.
Aydın
