Yeni Azərbaycan Partiyasının (YAP) yaradılmasının 32-ci ildönümü münasibətilə YAP Göyçay rayon təşkilatının inzibati binasında “Zəfər dolu 32 il” adlı tədbir keçirilib.Tədbirdə, əvvəlcə Ulu Öndər Heydər Əliyevin və ölkəmizin ərazi bütövlüyü və suverenliyi uğrunda canlarını qurban vermiş şəhidlərin əziz xatirəsi ehtiramla yad edilib.
YAP Göyçay rayon təşkilatının sədri Sahib Şükürov tədbiri giriş sözü ilə açaraq iştirakçıları bu əlamətdar gün münasibətilə təbrik edib. O, Yeni Azərbaycan Partiyasının 32 il ərzində keçdiyi şərəfli və zəfər dolu yoldan bəhs edərək, Azərbaycanın əldə etdiyi böyük nailiyyətlərin və tarixi Zəfərlərin Ulu Öndər Heydər Əliyevin yaratdığı, bu gün isə Prezident İlham Əliyevin Sədri olduğu partiyanın fəaliyyəti ilə sıx bağlı olduğunu vurğulayıb.
Tədbirdə çıxış edən rayon Ağsaqqallar Şurasının sədri Xəlil Orucov, Göyçay şəhər 4 saylı orta məktəbin tarix müəllimi Firəngiz Məmmədyarova, partiya veteranı Eldəniz Məmmədov, Göyçay Dövlət İdarəetmə və Texnologiya Kollecinin ərazi partiya təşkilatının sədri Səbinə Qurbanova, gənc partiya fəalı Coşqun İsmayılov, Peşə Liseyi ərazi partiya təşkilatının sədri Bahar Bədəlova və digərləri YAP-ın ölkənin inkişafında oynadığı mühüm roldan bəhs ediblər.
Natiqlər, Prezident, Yeni Azərbaycan Partiyasının Sədri cənab İlham Əliyevin rəhbərliyi ilə Azərbaycanın yüksək zirvələri fəth etdiyini və xalqımızın tarixi Zəfərlər qazandığını qeyd ediblər.
Tədbirin sonunda YAP sıralarına yeni qoşulan bir qrup gəncə partiya vəsiqələri təqdim olunub.
